برن بۆ سەر سنۆری، دیمەنەك ژ تراژیدیایا دایكێ
حازم سافیا بلەیی
بەری سپێدێ بوو، هێشتا رۆژێ ب دروستی چاڤێن خۆ نەهەلاندبوون. شەڤ ژ ترسێن رۆژێ دا بەرەڤ ئاڤابوونێ دچوو. دایك ل هژمەتا خەبەرەكێ نەخۆش نەدشیا بنڤیت، ژترسا خەو لێ نەكەفتیە. نزانیت چ بكەت! چ رێك نینە.
دەورودوورێن وان دگرتینە، ژبلی وێ چ سەرڤگێرێن دی نینە. هەوار دكەتە زارۆكان: هەستن، رابن، رەوش یا خرابە، هەمی تشت ل دژی مە دلڤن. دڤێت ئەڤ شەڤە هەر زوی دەركەڤین، بۆ جهەكێ نەپەن ب رەڤین، نەكو دێ مە ژی گرن.
كچا دەهـ سالی ب چاڤێت خەوڤە:
– خێرە دایكێ، دیسان چییە؟ كیڤە ب رەڤین؟
دایك ب چاڤێن تەژی ترس ڤە:
– شەڤێدی خەبەرەك هات، گۆت دێ خێزانێن بارزانیان گرن و بەنە سەر سنووری و دێ ژ ولاتی دەرئێخن .
كچ ب حێبەتی و ترس دبێژیت:
– بۆچی دایكێ مە چ كریە؟ ما ئەم بێگونەه نینن؟
دایك سەرێ خۆ دهەژینت و دبێژیت:
– هێی هێی كچا من، ما باب و مام و باپیر و خالێن تە چ كربوون؟! مابێگونەه نەبوون؟! گرتن و برن و بەزركرن، هەتا نوكە ژی چارەنڤیسێ وان دیارنییە .
هەر دووا پێكڤە گۆتن:
– ئەم بارزانینە لمە ناگەڕێن.
كچ رابوو سەر خۆ، هندەك تشت لێكدان، دەنگێ وێ دهات:
– ئاخ ئاخ دایكێ، ئەڤە چ قەدەرە ئەم كەفتینە تێدا؟
دایكێ برایێن وێ ژخەو هشیاركرن، گۆت:
– لەزێ بكە كچا من، وەختێ وێ هندێ نییە.
بەری دەركەڤن، دا خۆ ڤەشێرن، بەلێ لبن چاڤدێرییێ دابوون، هەر ل بەر دەرگەهی دایك و هەر پێنج بچوویك، دگەل خەسییا پیر كەتنە دەستێن رەشێن دوژمنی.
ئەوژی گەل سەدان كەسێن دی ل بارزانییان، ب كۆستەر و زیلێن عەسكەری، ڤەگوهاستن بەرەڤ دۆزەخا سەر سنووری و برن…
سال : ١٩٨٦
جهـ : چامەی سنورێ ئیراق و توركیا.
دەمژمێر: دەهێ شەڤێیە.
پشتی چەندین دەمژمێرا بڕێكێڤە ل پشتا زیلێن عەسكەری ئەم راوەستاندین، بەری بهێنە خارێ، سڕ و سەقەمە و دەست و پێ یێن سڕبووین، تاڕییا شەڤێ هزر و خەیالێن تەفر و تونا كری، ترسێ سنوورێن بەزاندی، پرس و خەیالان ل مێشكێ مەدا خۆ یێ گەڤزاندی، ئەم ژی غەریب و ئێخسیر دناڤ دەستێن واندا .
سەرباز هاتە هنداڤ مە و گۆت: “یەلا ئونزلو”.
دەمێ هاتین خارێ تە ژی چاڤێن مە ترس بوو. ب سەدان ژن و زارۆك ل كەس وكارێن وان ل وێرێ نە، بێ حال و پەریشانن، ئێخسیرێن بێ تاوانن.
بەرەڤ مرنێ دبەن، گرییا زارۆك و هەوارێن دایكان یێن دگەهنە عەرشێ خودێ. رۆژا حەشرێیە، بێ هەوار و بێكەسن، بەفرێ خەملا خۆ یا سپی یاكرییە كەرب و عەردێ پێ داپۆشی، دا پتر سەرما ببن، دەنگێ هشین و پێلێن رووباری ترس زێدەتر بەلاڤ دكر، رەخێ دیێ رووباری پری (ئەلغام)ن و مین رێژكری، زیل و كۆستەر چوون و ئەم بۆ مرنێ لوێرێ هێلاین .
دایكان پشتی ڤان هەموو دیمەنێت تراژیدی، دەستێت تەزی و قەرمتی بلندكرن و هەوارە خودێ، بەری ب رەزیلی بمرین، مە هێشتا هیڤیا بتە هەی، بۆ خاترا ڤان بچوویكێت هێتیم، ڤێ پیرەژنا غەریبە، مە لڤێ جەهنەما سەردونیایێ رزگار بكە .
دایك ب زارۆكێت خۆڤە دگەل پیرا بێچارە خوتێك وەركرن، هەمبێزا مرنێ و مالئاڤاهی بۆ ئێك ڤەكرن .
