پهیڤ و ئاواز تهمامكهرێن هەڤدو نە
رهمهزان زهكهریا
هونهرمهند محهمهد زۆرهگڤانی د دیدارەکێ دا بۆ رۆژناما ئهڤرۆ راگههاند: د جیهانا ستران و مۆزیكێ دا ههلبژارتنا پهیڤێ بنەمایێ وێ پهیامێ یە یا كو هونهرمهند دخوازیت بگههینیته دلێ گوهداران، بۆ ههر بهرههمهكێ سهركهفتی پێدڤیه ههماههنگیهكا تهمام د ناڤبهرا پهیڤ و ئاوازێ دا ههبیت، ژ بهر كو ههر دو تهمامكهرێن هەڤدوو نە.
ناڤبری گۆت ژی: ههردهم ل دهڤ من پهیڤ بنیاتێ سترانا سهركهفتی بوویە، ئهگهر پهیڤ خودان رامانهكا كویر نهبیت نهشێت ببیته هێڤێنێ بهرههمهكێ نهمر، گرنگی و زهنگینیا ئاوازێ دمینیته سهر بسپۆری و شارهزاییا ئاوازدانهری كو دڤێت ئاواز ل دووڤ پهیڤان بهێته دانان و گونجاندن.
ناڤهاتی گۆت: مخابن ئهڤرۆ گەلەک سترانان گوهداری دكهین كو تێدا پهیڤان خهم لێ دبارن بهلێ ئاوازا وێ یا ب سهما و دیلانه! نهرێكخستن دبیته ئهگهرێ وێ چهندێ كو تام و خۆشیا هونهرێ راستی بهرزه ببیت.
زۆرهگڤانی ئاشكراكر: ئهو سترانێن من د ڤان سالان دا گۆتین كو تێكهلهك بوون ژ خهم و خۆشیان، نیشانا تێكهلبوونا و نێزیكبوونا منه دگهل جڤاكی، هونهرمهند نهشێت خوه ژ ئازار و كهیفخۆشیێن خهلكێ خوه جودا بكهت لهورا بهرههمێن من رهنگڤهدانا ژیانا راستی نه.
محهمهد خویاكر: وهك هونهرمهند مه گازنده ههنه و داخوازایا مه ئهوه ناڤهندێن رۆشنبیری و هونهری ببنه جهێ هونهرمهند و رۆشنبیرا و ب دهستێ كهسێن شارهزا بهێنه رێڤهبرن هونهر پێدڤی ب دیدهڤانیهكا هونهری ههیه دا كو بشێت گهشهیێ بكهت.
زۆرهگڤانی تهكهزكر: ژیریا چێكری AI ئهڤرۆ وهك ڤایرۆسهكێ لێ هاتیه، كو بزاڤێ دكهت دیرۆك و ماندیبوونا بەرەبابێ داهاتی و یێ بهری مه بهرزه بكهت، تهكنهلۆژیێ مهترسیێ ل سهر وێ قوربانیدانێ دكهت یا هونهرمهندێن مهزن (حهسهن جزیری، تهحسین تهها، ئهیاز زاخۆیی، ئهردهوان زاخۆیی …هتد) پێشكێش كری پاراستنا كلتۆرێ كوردی ئهركێ مه ههمووانه.
ل دووماهیێ زۆرهگڤانی گۆت: گوهدارێن خوه ئاگههداردكهم كو دو پڕۆژه ل بهر دهستێ منن ههرچهنده هێشتا دهست ب كارێ توماركرنێ نهكریه، بهلێ دهمهك نێزیك دا دێ كار ل سهر كهم و گههینمه بهر دهستێ گوهدارێن خوه.
