داخوازی ل سەر گۆپالێن دار كنێرێ یا مشەیە
رەمەزان زەكەریا:
هاولاتی (حەجی ئۆسمان سورچی) كو ئاكنجیێ قەزا ئاكرێ یە، د دیدارەكێ بۆ رۆژنامە ئەڤرۆ گۆت: د كارێن دەستی دا چێكرنا گوپالان هونەرەكە پێدڤی ب ئارامی و شارەزایەكا باش هەیە بۆ گەلەك كەسان ئەڤە گۆپالە دارەكە بۆ پشتەڤانیێ، بەلێ بۆ خودانێ پیشەیێ، هەڤالێ ژیانێ و بەرهەمێ ماندیبوونا چەندین سالانە.
ناڤبری گۆت: چێكرنا گۆپالێ كوالێتی بلند ب كەیف و ئارەزوویا دلێ مرۆڤی ڤە گرێدایە، نەخاسمە د وەرزێن تایبەت دا باشترین دەم بۆ چەماندن و چێكرنا گۆپالی ژ هەیڤا نەهـ دەستپێدكەت هەتا هەیڤا سێ و د ڤێ دەمی دا دار ب ساناهی دهێتە نەخشاندن و چەماندن، ئەگەر وەرز یێ گونجای و خۆش بیت گۆپال زوو هشك دبن، بەلێ د سەرمایێ دا هەتا رادەیەكێ گیرۆ دبن،
بۆ زانین گەلەك جۆرێن داران بۆ دروستكرنا گۆپالان دهێنە ب كارئینان، بەلێ د ناڤ وان هەمووان دا دارێ كنێرێ سەركێشیا هەمووان دكەت ژبەركو دارێ كنێرێ ب ساناهی ناشكێت و یێ ب هێزە، ژ بەر جوانی و بهایێ وی یێ كلتۆری كڕیار پتر حەزژ گۆپالێ دار كنێرێ دكەن.
ل دووماهیێ گۆت: بەهرا پتریا وان دكەمە دیاری بەری ئێكێ بفرۆشم، من گەلەك داینە دۆست و هەڤالان، بهایێ گۆپالان ل دووف جۆرێ داران نەخش و ماندیبوونا ل سەر هاتیەكرن دهێتە دیاركرن، هندەك ژ وان بهایێ وان دگەهیتە 100 دۆلاران و هەر ئێك ژ وان ب بهایەكێ دهێتە فرۆتن، من چ مووچە نینە داهاتەكێ ب فرۆتنا گۆپالان كۆم دكەم.
