سترانەكا نوو ب ناڤێ كوردستان بەلاڤكر
زنار تۆڤی:
سترانبێژ (خەبات میرزا) نووترین سترانا خۆ ب ناڤێ كوردستان بەلاڤكر و وی ئەو سترانە پێشكێشی هەموو گەلێ كورد كریە، كو ب مەرەما ئێكگرتن و ئێكدەنگیا كوردان بەرهەمئینایە، ب تایبەتی ژی وەكو پشتەڤانیەك بۆ كوردێن رۆژئاڤایێ كوردستانێ ئەڤ سترانە گۆتیە.
هەروەسا گۆت: ئەڤ سترانە ژ پەیڤێن هەلبەستڤانێ مەزن (هەژار موكریانی) نە، ئاواز و گۆتن یێن منن و مۆزیكا سترانێ ژلایێ ئەمیر ڤایۆلین ڤە هاتیە ئامادەكرن و ل ستۆدیۆیا ژیدار هاتیە تۆماركرن، ئەڤ كارە ئێكە ژ سەرنجراكێشترین كارێن من یێن هونەری، چونكی ب دەنگ و رەنگ و پەیڤان روحەكا شۆڕەشگێری تێدا هەیە، ئەز ڤی بەرهەمی بۆ هەموو كوردێن رۆژئاڤایێ كوردستانێ و هەموو پێشمەرگەیان پێشكێش دكەم.
خەبات میرزا، خەلكێ باژێرێ سلێمانیێ یە، ل سالا 1986 ێ، ل گەل تیپا شانۆیا هونەر كاركریە، هەتا نوكە پتری 30 ستران بەلاڤكرینە و پرانیا وان ژ ئاوازێن وی ب خۆ نە، هەروەسا وەك ئەكتەر ژی وی پشكداری د پتری 40 شانۆگەریان و 7 فلمان و درامایەكێ دا كریە، نوكە ژی سەرپەرشتیارێ (فێرگەها هونەری یا گمۆ) یە كو ناڤەندەكا رەوشەنبیری یە.