من هونەرێ خۆ كریە پرەك بۆ تێكەلكرنا كلتۆری
زنار تۆڤی:
سترانبێژ (زارین ئانجو) د دیدارەكێ دا بۆ رۆژنامەیا ئەڤرۆ گۆت: بەری چەند رۆژان من سترانا (من دیت جارا ئەولی) یا هونەرمەندێ نەمر (ئەیاز زاخۆیی) ب دەنگێ خۆ گۆتیە و بەلاڤكریە یە، من گەلەك حەزژ ڤێ سترانێ دكر، لەوما من بڕیاردا بێژم، من ڤیایە هەردەم خزمەتا هونەرێ كوردی بكەم، ئەز بەردەوام سترانێن بەرێ دبێژم، چونكو دەنگێ من یێ گونجایە بۆ وان سترانان، هەروەسا ئەز ب پێدڤی دبینم كو هەر هونەرمەندەكی ستایلەكێ تایبەت بۆ دەنگێ خۆ هەلبژێریت داكو حەزژێكەرێن دەنگێ وان هونەرمەندان ب دەنگێ وان ئاشنا ببن.
هەروەسا گۆت: ئەو كەسێن د مۆزیكێ دگەهن دێ بەرهەمێن من ب دلێ وی بن، هەروەسا من هونەرێ خۆ كریە پرەك بۆ تێكەلكرنا كلتۆرێ باكور و باشورێ كوردستانێ، بۆ زانین ئەز هەموو پارچەیێن كوردستانێ وەكو ئێك دبینم و هەر كارەكی دوور ژ مرۆڤایەتیێ و ملەتێ من بیت، ئەز دێ ب هونەرێ خۆ ل دژی وی كاری راوەستم، ئەوا ل رۆژئاڤایێ كوردستانێ روودایی زۆلمەكا مەزن بوو ل هەمبەری كوردان هاتیە كرن، بەلێ كورد هەموو بوونە ئێك و هەموویان بەرگری ژ رۆژئاڤا كر، نوكە چەندین سترانێن نوو ل بەر دەستێ من هەنە و كاری ل سەردكەم، ئەو ژی ل نێزیك دێ بەلاڤ بن.
