د هەلكەفتان دا داخوازی ل سەر جلكێن كوردی زێدە دبیت
سندس سالح سلێڤانەیی:
هێمن جەلال دۆسكی، خودانێ پێشانگەها سەفین یا كرێكرنا جلكێن كوردی، د دیدارەكێ دا بۆ رۆژنامەیا ئەڤرۆ گۆت: ل سالا 2009 من دەست بڤی كاری كر و ئەڤ هزرە بۆ من ژوێ چەندێ هات كو ل وی دەمی گەلەك گەنجێن من حەزدكرن جلكێن كوردی بكەنە بەرخۆ، لێ ژبەركو قۆماشێ وان گەلەكێ گران بوو زوو ب زوو هەموو كەس نەدشان بكڕن.
هەروەسا گۆت: نوكە من (شەلوشەپك و خاك و قوتك و شەلوال و چۆخك) بۆ كرێكرنێ هەنە، شەلوشەپكێن دەستچن و مۆدرێن جوانیەكا تایبەت ددەنە بەژنا زەلامان و د هەموو هەلكەفتان دا، ژوانا دەوات و ئاهەنگێن دەرچۆنێ و نەورۆزێ گەنج دهێن جلكێن كوردی كرێدكەن، بۆ زانین مە جلكێن كوردی یێن هەولێرێ و سلێمانیێ و پارچەیێن دی ژی یێن كوردستانێ هەنە، هەروەسا جلكێن زاڕۆكان ژی و هەر دەستەكێ جلكان بۆ پێنج هەتا دەه جاران دهێنە بكارئینان.
