د هەیڤا رەمەزانێ دا مە بەرنامەیەك ل دهۆك تیڤی دێ هەبیت
دلۆڤان هالۆ:
مەدیاكار(نەشوان سۆفی) د دیدارەكێ دا بۆ رۆژنامەیا ئەڤرۆ گۆت: ئەز دەرچۆیێ پشكا راگەهاندنێ مە ل ئامادەییا ڤیا یا پیشەیی، ئێكەم وێستەگەها منا راگەهاندنێ ژی (ڤیا مەدیا) بوو، كو ئەز ئێكەم پەیامنێرێ وێ یێ مەیدانی بووم و من ئەڤ چەندا هەلبژارت داكو ببیتە پرەك و بشێم ب وێ رێكێ بچمە كولیژا هونەرێن جوان، لێ پشتی من راگەهاندن خواندی من حەزژێكر و ل سەر داخوازا ماموستایێن خۆ ئەز هاتمە دناڤ بوارێ راگەهاندنێ دا.
هەروەسا گۆت: پەیامنـــــــێری و پێشكێشكاری هەردو ژ بسپۆریا منن و هەكە مرۆڤی پەیامنێریا مەیدانی كر دشێت هەموو كارێن دی یێن راگەهاندنێ بكەت، لێ پتر حەزا من ل سەر پێشكێشكاریێ یە، هەرچەندە راگەهاندن هەموو وەستیانە، لێ پتر چاڤێن مرۆڤی بۆ ژیانێ ڤەدبن، هەروەسا مرۆڤ پتر هەست ب بەرپرسایەتیێ دكەت، لەورا دڤێت مرۆڤی پاشخانەیەكا باش یا پێزانیان هەبیت، بۆ زانیان د هەیڤا رەمەزانێ دا دێ مە بەرنامەیەك ب ناڤێ (لایێ دی) ل سەر شاشەیا دهۆك تیڤی هەبیت، ناڤەرۆكا بەرنامەی دێ بۆ تەخەكا مرۆڤان دناڤ جڤاكی دا بیت، هیڤیا من ئەوە ئەم بشیێن خزمەتا وێ تەخا گرنگ بكەین، كو ئەو ژی دایك و بابن.
