من دڤیا نیشابدەم كو مرۆڤێن ماندی پادشاهێن كەرامەتێ نە
شاكر ئەتروشی:
نیڤین حەسەن، پێشكێشكارا بەرنامەیێ (خێر و بێر) د دیدارەكێ دا بۆ رۆژنامەیا ئەڤرۆ گۆت: هزرا چێكرنا ڤی بەرنامەی ژ وێ باوەریێ هات كو مرۆڤایەتی نەك هەر (پێدانە) بەلكو (پێكڤەبوونە) و من دڤیا بەرنامەیەكی چێكەم كو تێدا جوداهی د ناڤبەرا (بەخشینەری و وەرگری) دا نەمینیت. من دڤیا نیشابدەم كو مرۆڤێن ماندی یێن ل سەر جاددەیان، پادشاهێن كەرامەتێ نە و مە فەرە ئەم بچینە سەر سفرەیا وان دا كو ژ وان فێری راستییا ژیانێ ببین (خێر و بێر) نامەیەكە دبێژیت: ئەم هەمی پێكڤە د بەرەكەتێ دا د هەڤپشكین.
هەروەسا گۆت: شێوازێ مە یێ جودایە، چونكو ئەم وەك (مێهڤان) دچین، نە وەك (خێرخواز) بەرنامە ب دیتنا قارەمانەكێ كار و ماندیبوونێ دەست پێ دكەت، پاشان ئەم ل گەل وی دچینە ناڤ بازاڕی و ماركێتێ و ب هەڤڕا تشتێن پێدڤی دكڕین، خالەكا گرنگ ئەوە كو ئەز وەك كچەك دچمە ناڤ خێزانێ، ل گەل وان خوارنێ چێدكەم و ل سەر ئێك سفرە د روینین، جوداهیا مە ئەوە كو ئەم نەك هەر زكێ وان تێر دكەین، بەلكو ئەم د هەست و ژیانا وان دا دبینە پشكەك، وەك كچەك، من دڤیا نیشا بدەم كو ئافرەت دهێتە هژمارتن ب كانیا دلۆڤانی و هەستێ مرۆڤایەتیێ، مە دڤێت ژن و كچ پتر د ڤان كاران دا دیار بن، چونكە ئەم پتر دشێین نێزیكی ناڤ دلێ خێزانان ببین،پەیاما من ئەوە كو خێر نەك هەر پارەیە، بەلكو گرنژینەك و پەیڤەكا جوانە كو دشێت ژیانا مرۆڤەكی بگوهۆڕیت، بۆ زانین بتنێ ئەز گەهێنەرم و ئەڤ بەرەكەتە هەموو ب پشتەڤانیا مرۆڤێن دلپاك و خێرخوازێن مە یێن هێژا بوویە، سوپاسیا وان دكەم كو باوەری داینە من و بووینە ئەگەرێ هندێ كو ئەم پێكڤە تیشكەكا هیڤیێ بگەهینینە ناڤ مالێن ماندی. ئەڤە كارەكێ ب كۆمە و هەر ئێك ژ مە پشكەكە ژ ڤێ (خێر و بێرێ).
