سۆشیال میدیا و قەیرانا دارایی خێزانێ دهەڕفینن
ههولێر، قائید میرۆ:
جڤاتا دادوهریێ ل ههرێما كوردستانێ ئامارێن سالا بۆری یێن پرۆسا ههڤژینیێ و بەردانێ بهلاڤ كرن و ل گورهی ئامارا فهرمی سالا بۆری 2025ــێ رێژهیا تۆماركرنا گرێبهستێن ههڤژینیێ زێده بۆینە، ههروهسا ل پارێزگهها دهۆكێ سالا بۆری دو هزار و 354 حالهتێن بەردانێ هاتینه تۆماركرن.
ل گورهی ئامارا جڤاتا دادوهریێ سالا بۆری 2025 ێ ل سهرانسهری ههرێما كوردستانێ زێدهتری61 هزار مامهلهیێن پرۆسا ههڤژینیێ ل دادگههان هاتینه تۆماركرن، ههروهسا سالا بۆری پازده هزار و 826 مامهلهیێن بەردانێ هاتینه تۆماركرن و ههر ل سالا بۆری ل دهۆكێ 2354 حالهتێن بەردانێ ههبون، ل گورهی ئامارێن فهرمی رێژهیا بەردانێ ل دهۆكێ زێده بوویه ب ههڤبهركرن دگهل سالا بۆری.
جڤاتا دادوهریێ ئاماژه پێ كر، ئهگهرێ سهرهكیێ تهلاقێ ل دهۆكێ بۆ نهگونجانا ههڤژینان ڤهدگهڕیت ب پلا ئێكێ و دوڤدا ئامیرێن پهیوهندیان و مۆبایل و ئنترنێت ئهگهرێن دینه بۆ ئهنجامدانا تهلاقێ دناڤبهرا ههڤژینێن دهۆكێ.
حاجی عزهدین، شیرهتكارێ رێڤهبهریا گشتی یا بهرهنگاربوونا توندوتیژیێ دژی خێزانێ بۆ رۆژنامەیا ئهڤرۆ دیار كر کو راسته ڤان سالێن دووماهیێ ئهگهرێن تێكچوونا خیزانێ هاتینه گۆهۆڕین ژ وان ژی نهگونجانا ههڤژینان و مایتێکرن د ژیانا هەڤژینان دا، ژلایێ كهس و كارێن ههردو لایان، ههروهسا ئامیرێن پهیوهندیان و بكارئینانا سۆشیال میدیایێ بشێوهیهكێ خەلەت ئهگهرهكێ دیه بۆ بەردانێ.
حاجی عزەدین دیار کر ژی، ئهو بادهكێن دگههنه رێڤهبهریێن بهرهنگاربوونا توندوتیژیێ و سكالایێن ل دادگههێ دهێنه تۆماركرن بهردهوام ئاریشا دناڤبهرا هەڤژینان نهگونجانه یانژی سۆشیال میدیا و تۆڕێن جڤاكی نە، ئهڤهژی مهترسیه بۆسهر جڤاكی و تێكچوونا شیرازا خێزانێ.
شیرهتكارێ رێڤهبهریا گشتی یا بهرهنگاربوونا توندوتیژیێ دژی خێزانێ گۆت؛ مه زۆر جارا شیرهت داینه گهنجان بهری بچنه د پرۆسا ههڤژینیێ دا رهوشنبیریا خێزانێ بزانن، ژبەرکو پرۆسا ههڤژینیێ كارهكێ پیرۆزه، لهوڕا پێدڤیه ژن و زهلام پێكڤه بهرپرسیاریهتیا رێڤهبرنا خێزانێ بزانن و بشێوهیهكێ ساخلهم سهرهدهریێ دگهل ئێكودو بكهن.
ژلایەکێ دیڤە بورهان عهلی، سهرۆكێ ئێكهتیا زهلامێن كوردستانێ بۆ رۆژنامەیا ئهڤرۆ دیار کر، مخابن گهنجێن نوكه دهمێ دچنه دناڤا پرۆسا ههڤژینێ زۆر تێكهلی ئێكودو نینن و زانیاری لدور پرۆسا ههڤژینیێ و پێكئینانا خێزانێ نینن و گۆت؛ لهوڕاژی پشتی ئهنجامدانا پرۆسا ههڤژینیێ تووشی ئاریشهیان دبن و هندهك ژ وان دگههنه بەردانێ.
بورهان خالهكا دی یا گرنگ دیار کر ئەو ژی قهیرانا دارایی و لاوازیا ئابوری یا خێزانان كاریگهری ههبوویه لسهر تێكچوونا خێزانێ و زۆربوونا رێژەیا بەردانێ، چونكه نهبوونا كاری و درهنگ بهلاڤكرنا مووچێ فهرمانبهران و نهبوونا ژێدهرێن ژیانێ ئهگهرن ئاریشه دناڤبهرا ههڤژینان پهیدا ببن و گۆت؛ مخابن هندهك ژوان بگههنه ههلوهشاندنا خێزانێ، ئامارێن توندوتیژیا ههمبهر زهلامان ژی سال بۆ سالێ زێده دبن و بهردهوام سكالا دگههنه ئێكهتیا زهلامان لدۆر ههبوونا ئاریشێن خێزانێ.
