دەمژمێرا زیرەك هاریکاریا رێکخستنا رۆژیێ دكهت
پەروین سەلاح:
هەیڤا پیرۆزا رەمەزانێ سالانە گوهۆڕینێن مەزن د رۆتینا ژیانا مرۆڤی دا پەیدا دکەت، ب تایبەت د دەمێن نڤستن، پاشێڤ و چالاکیێن رۆژانە دا. د ڤێ چوارچۆڤەیێ دا، دەمژمێرێن زیرەک ئێدی بتنێ ئامرازەکێ کاتژمێری نینن، بەلکو بووینە هەڤالەکێ تەکنۆلۆژی یێ گرنگ بۆ رێکخستنا رۆژیێ و چاڤدێریا ساخلەمیێ ب رەنگەکێ زیرەکانە.
پشتەڤانیا ساخلەمیێ ب زیرەکیا چێكرى
ب بکارئینانا سێنسۆرێن پێشکەفتی و زیرەکیا چێكرى، دەمژمێرێن نوو پشتەڤانیەکا راستەقینە پێشکێشی رۆژیگران دکەن. ل گۆرەی راپۆرتەکا مالپەرێ “NMC”، نوشدار پشتراست دکەن کو ئەڤ ئامیرە بۆ وان کەسێن نەخۆشیێن درێژخایەن وەک شەکرێ و فشارا خوینێ هەین گەلەک ب مفانە. ئەڤ دەمژمێرە ب بەردەوامی لێدانا دل، رێژەیا ئۆکسجینێ د خوینێ دا، ئاستێ ماندووبوونێ دپێڤن.
نوشدارێن ل دەولەتا ئیماراتێ ئاماژێ ب وێ چەندێ دکەن کو ئەڤ تەکنۆلۆژیا دۆکۆمێنتکرنا دەمکی (Real-time) بۆ رەوشا لەشی ددەتە بکارئینەری. ئەڤە هاریکارە بۆ دەستنیشانکرنا زووی یا هەر نیشانەکا هشکبوونا لەشی (Dehydration) یان داکەفتنا ئاستێ شەکرێ، ب تایبەت د دەمێن درێژ یێن رۆژیگرتنێ دا.
چاڤدێریا خەوێ و شێدارکرنا لەشی
ئێک ژ ئاریشێن هەرە مەزن د رەمەزانێ دا، تێکچوونا سیستەمێ خەوێ یە ژبەر دەمێن پاشێڤێ و عیبادەتێن شەڤێ. لێکۆلین دیار دکەن کو دەمژمێرێن زیرەک شیانێن شیکارکرنا کوالیتیا خەوێ هەنە و رێنمایان ددەنە بکارئینەری کا دێ چەوا دەمێن حەواندنێ د ناڤ رۆژێ دا رێکخیت.
ژ لایەکێ دی ڤە، پاراستنا تەڕاتیا لەشی و هەڤسەنگیا شلەمەنیان د رۆژێن گەرم دا کارەکێ بزەحمەتە. دەمژمێرێن زیرەک ب رێکا ئاگەهداریا (Alerts)، رۆژیگری هان ددەن کو پشتی فەتارێ رێژەیا پێدڤی یا ئاڤێ ڤەخۆت دا کو لەش تووشی هشکبوونێ نەبیت.
ئامرازەک بۆ ژیانەکا ساخلەمتر
دەمژمێرێن زیرەک ئەڤرۆ وەک راوێژکارەکێ ساخلەمیێ یێ تەمام کار دکەن. ئەو بتنێ گاڤێن مە ناژمێرن، بەلکو ب شیکارکرنا گوهۆڕینێن لێدانا دل (HRV) و دابینکرنا پلانێن کەسۆکی بۆ نڤستن و خارنێ، هۆشیاریەکا دەمکی ددەنە رۆژیگران. ئەڤە دبیته ئەگەرێ هندێ کو مرۆڤ مەها رەمەزانێ ب رەنگەکێ ساخلەم، هەڤسەنگ و پاراستی دەرباز بکەت.
