جارەكا دی ئەمریكا بەربژاركرنا نووری مالكی ڕەت دكەت
بەرپرسەكێ بلند یێ ئەمریكی ل كۆچكا سپی ب ڕۆژنامەیا شەرقولئەوسەت ڕاگەهاند ئەمریكا پشتەڤانیێ ل ئیراقێ دكەت بۆ ب دەستڤەئینانا ئارامیێ و ئاسایشێ و خوەشگوزەرانیێ.
وی بەرپرسێ ئەمریكی ڕەتكرنا وەلاتێ وی بۆ بەربژاركرنا نووری مالكی بۆ پۆستێ سەرۆك وەزیرێن داهاتیێ ئیراقێ دوپاتكر و ڕاگەهاند» حوكمەتەك كو ژ ئالیێ ئیرانێ ڤە یا كۆنترۆلكری بیت و نەشێت بەرژەوەندیێن ئیراقێ ل بەراهیێ ب دانیت و ئیراقێ ژ ململانێیێن ناڤچەیی دووربێخیت، یان مفایێ هەڤپشكییا د ناڤبەرا ئەمریكا و ئیراقێدا ب هێز بكەت، بێگومان دێ هێتە ڕەتكرن».
ئەڤ ڕەتكرنا ئەمریكا گەهشتە وی ئاستی كو دۆنالد ترەمپ، سەرۆكێ ئەمریكا ڕاستەوخوە گەفێن سەپاندنا سزایان و بڕینا هاریكارییان ل ئیراقێ بكەت، ئەڤێ چەندێ ژی چارچۆڤەیێ هەماهەنگیێ یێ شیعی ئێخستە پێشبەری ئەزموونەكا گران د وەختەكیدا ئیراق د ڤالاهییا دەستووریدایە پشتی هەلبژارتنێن مەها 11 یێن سالا 2025».
گەفێن ترەمپی پێك دهێن ژ سەپاندنا سزایان یان بلۆككرنا داهاتێ هنارتنا پەترۆلا ئیراقێ كو ل بانكا یەدەگێ فیدرالی ل نیویۆك هاتیە دانان، هەروەسا دبیت پەنا بۆ سینۆرداركرنا دەستڕاگەهشتن ب ئیراقێ ب یەدەگێ دۆلارێ ئەمریكی ببەت» .
دۆنالد ترەمپ سیاسەتەكا تێكهەل ژ گەفان و مفایێن ئابۆری بەرانبەر ئیراقێ پەیڕەو دكەت، وەك ڕێدان ب كۆمپانیێن پەترۆلی یێن ئەمریكی وەك شیڤرۆن بۆ هاتنا دناڤ بازاڕێ ئیراقێدا و دوبارە داڕێشتنا دیمەنێ سیاسیێ ئیراقێ دوور ژ دەستێ دەرەكی.
هەروەسا ماركۆ ڕوبیۆ، وەزیرێ دەرڤەیێ ئەمریكا هەڤبەندی ل محەمەد شیاع سوودانی، سەرۆك وەزیرێن ئیراقێ كریە و هۆشدارێ دایێ ژ وێ چەندێ حوكمەتەك ژ ئالیێ ئیرانێ ڤە پشتەڤانی لێ بهێتە كرن یا سەركەفتی نابیت، ئاماژە ژی ب ئەگەرێ سەپاندنا سزایان ل سەر تاك و دەزگەهێن ئیراقی كر هەمە ل سەر بەربژاركرنا مالكی بەردەوام بن.
ژ ئالیێ خوەڤە تۆم باڕاك، هنارتیێ تایبەتێ سەرۆكێ ئەمریكا بۆ سووریێ، د دیدارێن خوە دا ل چەند ڕۆژێن بۆری ل گەل بەرپرسێن ئیراقێ، دوپاتی ل سەر بەركردایەتییەكا كاریگەر كریە كو گونجای بیت ل گەل سیاسەتێن ئارامیێ، هەروەسا هۆشداری ژ وێ چەندێ ژی دا هەر حوكمەتەك ژ ئالیێ دەستێ دەرەكی ڤە بهێتە دامەزراندن، دێ شكەستنێ د بجهئینانا خواست و داخوازیێن گەلێ ئیراقێ یان پێكئینانا هەڤپشكییەكا كاریگەر ل گەل ئەمریكا ئینیت.
