نەهـ سالن بەرنامەیێ وی یێ بەردەوامە
هەرهین محەمەد:
شڤان كۆچەر، پێشكێشكارێ بەرنامەیێ (شەڤ و شڤان) كو ئەڤە نەه سالن ل رادیۆیا دهۆك یێ بەردەوامە، د دیدارەكێ دابۆ رۆژنامەیا ئەڤرۆ گۆت: ل دەستپێكێ ناڤێ بەرنامەی (شەڤ باش بوو) نوكە ناڤێ وی شەڤ و شڤانە، بەلێ دەمێ دبیتە هەیڤا رەمەزانا پیرۆز ئەم ناڤێ بەرنامەی دكەینە شەڤێن رەمەزانێ و ل سەرانسەری هەرێمێ مە گوهدار و بینەرێ خوە هەیە و هەتا نوكە بینەر ل ئەوروپا هەنە و پەیوەندیێ ب مە دكەن و ل سۆشیال مەدیایێ ژی بینەرەكێ باش هەیە.
هێشتا گۆت: ل سالا 2017 ل رادیۆیا دهۆك دەستبكاربوویمە و هەتا نوكە یێ بەردەوامم و گەلەك سالان ژی من خۆبەخش كاركریە و دەمێ خوە دا گەلەك دەزگەه و رادیۆیان داخواز ژمن كر لێ كاربكەم، بەلێ من رادیۆیا دهۆك (دایك) هەلبژارتیە و دبینم ئەڤ رادیۆیە ئێكە، لەورا من دەست ژێ نەبەرداینە و دبیت ل تیڤیەكێ، یان رادیۆیەكا دی من كاركربا پتر داهات بۆ من هاتبا و دبیت ئەز كربامە كارمەندێ خوە یێ فەرمی، بەلێ گەلەك ل گەل رێڤەبەر و ستافێ رادیۆیێ یێ ئارامم، لەورا هەتا نوكە یێ بەردەوامم و یێ رازی مە ب ئەوی داهاتی یێ ئەو ددەنە من.
