بابێ من ب تەختێ زیندانێ ڤە دهاتە گرێـدان و ئەشكەنجەدان
سالار محەمەد دۆسكی:
4-7
رۆژەكێ (تەیب ئەلكیشكی) خودێ ژێ رازیبت ئەوی و (نەجمەدین یوسفی) جابا من هنارتن وی دەمی بارەگایێ مەیێ لژنێ ل گەلیكێ (دشێشێ) بوو و ئەو گۆت وەرە ڤێرە مە كارەك ب تەهەیە، نەچاربووم بچم و چوومە وێرێ و من سلاڤكر و من گۆتێ هەوە چ كار ب من هەیە؟ گۆت مە ئێك دڤێت ببیتە كادرێ مە و مە تو هەلژارتی ببیە كادرێ مە و من گۆتێ ئەز پیشمەرگە مە و دڤێت مام (ئەسعەد خوشەبی) رازیبوون ل سەر هەبیت گۆت بلا ئەم دێ چینە دەف (ئەسعەد) ئەز و ( تەیب و نەجمەدین یوسفی) چووینە دەف (ئەسعەد) وی دەمی بارەگایێ وی ل قومریێ بوو و ئەم چووین مە سلاڤكر و جامێری سلاڤا مە وەرگرت و ئەوا هەردوكان بابەت بۆ (ئەسعەد) شرۆڤەكر و گۆتێ ئەم حەز دكەین ئەڤی پێشمەرگەی بدەیە مە چونكە مە كار پێ هەیە، گۆتێ(نەجمەدین) ئەڤە یێ بچوویكە و كارێن بزحمەت نەدەنێ و كارەكێ هوسا بدەنێ بشێت راكەت، ئەوا گۆتێ ئەزبەنی مە بۆ كادریێ یە وی دەمی كەسێن قەلەم دار دكێم بوون وهەر نەبوو، من ل ئامێدیێ خواند بوو و گۆت تودێ شێی ل گەل ئەڤان كار كەی من گۆتێ كەیفاتیە مام (ئەسعەد) تو بێژی هەرە دێ چم و تو بێژی نە چە ناچم و كەیفا تەیە و ئەوا گۆت (مەلا ئەحمەدێ گەرەگوهی) ئانكو (گەرەگوها بەرێ گارێ) شەهید بوویە و دێ تە دانینە جهێ وی و من گۆتێ( مەلا ئەحمەدێ گەرەگوهی) شەهید بوویە و دێ چمە جهێ وی گۆتن بەلێ و گوندێن وا چەندن كو نێزیكی (28) گوندانە و دێ كارێ تە رێكخستن بیت ل ئەوێ دەڤەرێ و من گۆتێ مام (ئەسعەد) كەیفا تەیە و ئەگەر تە حەز ل سەر هەبیت هەما بلا، گۆت بلا هەرە بەلێ ئەگەر كارەكێ گەلەك بزحمەتە گۆتنە تە تو نەكە گۆت باشە (تەیب و نەجەمەدین) گۆتێ دروستە ئەزبەنی.
ئەز بوومە كادرێ دەڤەرێ و چوومە دەڤەرێ بۆ جارا ئێكێ (جەعفەرێ عەلی سەعدو هروری) من ل گەل خوە بر و جارا دووێ من (ئەحمەد عەبدوللا) ل گەل خوە بر یێ (دیلی) بوو و جارا سیێ ئەز بخوە چووم و چەند پێشمەرگە دانە ل گەل من و ئێك ژ دگۆتێ(حەمید حەسەن، عەبدوللا حەسەن، جەعفەر محەمەد،فوئاد عەبدوللا، ئەحمەد موسا) ئەحمەدێ ساخە و ئەڤێن دی چووینە بەر دلوڤانیا خودێ خودێ ژ هەمیان رازی بیت و پێشمەرگە دانە ل گەل من و چوومە دەڤەرێ وئەوا گۆتی چەند هەیڤان دێ ڤی كاری كەی و دووڤا دێ تە ڤەگوهێزین و دێ هیە ناڤ بەرواری یا و ئەز وی دەمی بەرپرسێ رۆژهەلات و رۆژئاڤا بووم و من ژی گۆت باشە هەتا پێنچ بۆ شەش هەیڤان خودێ كەریمە، چەند هەیڤ بورین و من كاغەز نڤێسین و من گۆتێ ئەز نەشێم ب پیا بێم و بچم گۆتن ئاریشە نینە ئەم یێ بووتە سەحكەینە ئێكی و سەحكرنە ئێكی هەتا شەش حەفت سال دەرباز بووین و هندی كاغەزا نڤێسم بوو من (نهلێ و نزارێ زێبارێ) ژی هەر دو زێدەكرن و (دەشتا زێ) ژی زێدەكر و من رێكخستنا حزبی دكر و ئەو پێزانیێن لقێ رادەستی لژنێ دكرن و لژنێ رادەستی مە دكرن مە نەدە بۆ خەلكی خاند و پەیرۆ و پرۆگرام مە نیشا خەلكێ خوە دا (27) گوندێن بەرێ گارێ بووم ئەز چوومێ دەڤەرا نهێلێ ژی (12) گوند بوون و دەڤەرا (دەشتا زێ) ژی هەشت گوند بوون ئەوانژی ئەز چوومێ و هندەك رۆژا سێ بۆ چار گوندا من رۆژەكێ دا ب دووماهی ئینان وی دەمی ئەندامێن پارتی ژی كێم بوون و هندەك گوندا دو هندەكا ئێك لێ بوون و هندەك گوندان پێنچ لێ بوون بڤی رەنگی و هەمی رێكخستیێن گوندێن ئەز دچوومێ هەر هەمی زەلام بوون.
هەمان پێشمەرگەیێ هەر دو شۆرەشێن ئیلوۆن و گولانێ ل دور بەیانا 11ی ئادارێ گۆت: دەمێ رێكەفتنا 11ی ئادارێ دناڤبەرا حوكمەتا ئیراقێ و شۆرەشا ئەیلۆلێ دا درست بووی وی دەمی ل گوندێ(رەشاڤا) بووم وی دەمی رادیویەكا بچوویك د دەستێ من دا بوو و رادیۆیێ رێكەفتن خواند و چوومە گوندی و من گۆتە (تاهرێ ملا ئەحمەدێ رەشاڤایی) من گۆتێ تە رادیو هەیە؟ گۆت بەلێ بەلێ من گۆتێ تە نەڤەكریە.؟ گۆت خێرە؟ من گۆتێ بەیانا 11ی ئادارێ هاتە راگەهاندن و كورد و عەرەب پێك هاتن گۆت چەوا؟ من گۆتێ دەست ب دانوستاندنا دناڤبەرا شۆرەش و حوكمەتا بەعس دا هاتەكرن ئەوێ رۆژێ من تەماشەكرێ( ئەحمەد توفیق) ژوور دا یێ دهێت یێ ل ماهینەكێ سوارە و گازی من كر كاك (عەلی) من گۆتێ بەلێ گۆت گەردەنا من ئازا كە ئەز هاتیمە ڤەگوهاستن ژ ڤێرە و ئەز دێ چەم دەڤەرا سوران و ئێدی من دەنگ و باسێن وی نەزانین.
