خەلیل حسێن: ڕەوشا دەڤەرێ و قەیرانا دارایی بەرهەڤیێن تیما مە ڕاگرتینە
رەمەزان زەكەریا
د داخۆیانیەكێ دا جێگرێ سەرۆكێ یانەیا دینارتە ئاشكراكر هەتا نوكە ب شێوەیەكێ فەرمی تیما وان یا فوتبۆلێ دەست ب بەرهەڤیان نەكریە و ئەگەرێ سەرەكی ژی بۆ نەجێگیریا ڕەوشا دەڤەرێ ڤەدگەڕیت، نەشێن بێی پشتراستبوون ژ ئەنجامدانا یاریان چو خەرجیێن دارایی بكەین، ئەم چاڤەڕێی باشتربوونا ڤێ رەوشێ نە داكو خەرجیێن مە ب هەدەر نەچن و پاشان یاری نەهێنە ئەنجامدان.
زێدەتر خەلیل حسێن بۆ رۆژناما ئەڤرۆ گۆت: مە باوەری ب شیانێن ناڤخۆیی هەنە و ستافێ ڕاهێنەران دێ یێ خۆجهێی بیت، لێ د هەمان دەم دا راهێنەرێ یانەیێ ژبەر كو ئەركێ تایبەت هەیە د ڤێ رەوشێ دا نوكە ستافێ راهێنەران یێ بەرهەڤ نینە ب ئاوایەكێ دروست دەست ب كارێن خۆ بكەت.
ناڤبری گۆتژی: بنگەهێ سەرەكی و بڕبڕەیا تیمێ دێ یاریزانێن دەڤەرێ و ناڤخۆیی بن، بۆ ب هێزكرنا هندەك پێگەهێن هەستیار، دێ هژمارەكا یاریزانان ژ دەرڤە ئینیت پێخەمەت هەڤڕكیەكا ب هێزتر د خولێ دا.
ناڤهاتی گۆت: ئاریشەیا ئابووری مەزنترین ئاستەنگە ل هەمبەر كاروبارێن یانەیێ هەر چەندە هندەك چارەسەریێن دەمكی بۆ هاتیینە دیتن، لێ وەرزش ب ڤێ رەنگێ دەمكی بڕێڤە ناچیت، وەرزش پێدڤی ب پشتەڤانیا بەردەوام هەیە بێی هەبوونا بۆدجەیەكێ جێگیر بەردەوامبوونا مە دێ یا ب زەحمەت بیت.
