گوهۆڕینێن ل دەڤەرێ مەترسیێن گەلەک مەزنن بۆ تورکیا
سەرۆکێ گشتی یێ پارتا زەفەر ل تورکیا دیار کر، ئەمریکا و ئسرائیل کار بۆ گوهۆڕینا نەخشێ نها یێ رۆژهەلاتا ناڤین دکەن و دخوازن هەرێمەکێ ل ئیرانێ ژی بۆ کوردان دروست بکەن، هەکە دەستهەلاتا نها یا ئیرانێ ژناڤ بچیت و ل ئیرانێ گوهۆڕینێن بنگەهین روو بدەن وی دەمی دێ مەترسی بۆ تورکیا ژی دروست بن، چونکی بەرپرسێن ئسرائیلێ ب ئاشکرا دبێژن پشتی ئیرانێ دۆرا تورکیا یە، لێ مخابن بەرپرسێن تورکیا هەتا نها ژی هەست ب مەترسیێن مەزن ل سەر پاشەرۆژا تورکیا نەکرینە.
ئومید ئۆزداغ ئەو یەک ژی دیار کر، پشتی نەمانا دەستهەلاتا نها یا ئیرانێ دێ ئسرائیل و ئەمریکا هەموو کارەکێ ل دژی تورکیا کەن، ئارمانجا ئسرائیلێ لاوازکرنا تورکیا یە، ئەو دێ کار بۆ پارچەکرنا تورکیا کەن، دڤێت دەستهەلاتا نها یا تورکیا دەست ب پێرابوونێن پێدڤی بکەت و رێ نەدەت دەستێوەردان د کاروبارێن ناڤخوەیی یێن تورکیا دا بهێتە کرن، مخابن ئەردۆغان و بەرپرسێن دی یێن تورکیا تنێ دبێژن ئەم نابیتە پشکەک ژ شەڕی و نەشیاینە هندەک کارتێن بهێز ژ بۆ بەرژەوەندیێن تورکیا بکار بینن، دڤێت دەستهەلاتا ئاکپارتیێ باش بزانیت هەر گوهۆڕینەک نها ل رۆژهەلاتا ناڤین روو بدەت دێ بیتە مەترسیەکا گەلەک مەزن بۆ تورکیا و دڤێت تورکیا رێگریێ بکەت.
