داگیرکرنا گزیرتا خارک دێ شەڕی بەتە قووناغەکا دی
بسپۆرەکێ کاروبارێن ئیرانێ دیار دکەت، هەکە ئیران خوە رادەست نەکەت دێ ترامپ فەرمانا داگیرکرنا گزیرتا خارک دەت و ب داگیرکرنا وێ دێ ئیران گەلەک لاواز بیت، چونکی خارک ژێدەرێ سەرەکی یێ پەترۆلا ئیرانێ یە و دێ ئیران تووشی کارەساتەکا مەزن بیت.
مەیسەم مورادی بسپۆرێ کاروبارێ ئیرانێ دیار کر، ئەمریکا و ئسرائیل هەتا نەگەهنە ئارمانجێن خوە شەڕی ب دووماهی نائینن و بەری دو رۆژان ژی ئەمریکا و ئسرائیلێ بریار دان کو بۆ دەمێ سێ حەفتیێن دی ژی بەردەوامیێ بدەنە شەڕی و بەرپرسێن هەر دو وەلاتان دیار دکەن هێشتا ژی ب هزاران جه ل ئیرانێ هەنە کو دڤێت بهێنە بۆمبەباران کرن، ئەو یەک ژی نیشا ددەت ئەمریکا و ئسرائیل ل سەر ستراتیژیەکا هەڤپشک بۆ پاشەرۆژا ئیرانێ رێککەفتینە و گۆت: (بەری نها ژی چەندین جاران ترامپی دیار کریە دڤێت ئیران خوە رادەست بکەت و هەروەسا ترامپی ب ئاشکرا ژی گۆتیە دڤێت پەترۆلا ئیرانێ بکەڤیتە دەستێ ئەمریکا، ئەو یەک ژی نیشا ددەت دێ شەڕ بۆ دەمەکێ دی ژی ڤەکێشیت و ئاماژەیێن نها نیشا ددەن کو ئەمریکا کار بۆ داگیرکرنا گزیرتا خارک دکەت کو ژێدەرێ سەرەکی و مەزن یێ هنارتنا پەترۆلا ئیرانێ یە).
ناڤهاتی ئەو یەک ژی دیار کر، بێگومان داگیرکرنا خارکێ دێ بیتە ئەگەر ئیران تووشی کارەساتەکا مەزن بیت، چونکی وی دەمی ئێدی ئیران نەشێت چو کارتێن وەسا مەزن ل دژی ئەمریکا بکار بینیت، نها ئەمریکا کار بۆ ڤێ یەکێ دکەت کو بریتانیا، فرەنسا و وەلاتێن دی یێن ئەندامێن ناتۆ هاریکاریا وان بکەن، هەکە شەڕ ڤەکێشیت دبیت وەلاتێن دی یێن ناتۆ هاریکاریا ئەمریکا بکەن، چونکی ترامپ باش دزانیت هەکە هەتا مەهەکا دی شەڕ بەردەوام بیت دێ بهایێ پەترۆلێ گەلەک گران بیت و وەلاتێن ئێکەتیا ئۆرۆپا دێ تووشی قەیرانەکا مەزن بن و دێ نەچار بن هاریکاریا ئەمریکا کەن و گۆت: (ئیرانێ دڤێت هەموو کارتێن هەی بکار بینیت، یا نها ئەم دبینین بەرپرسێن ئیرانێ ناخوازن داخوازیێن ئەمریکا قەبوول بکەن و دخوازن بەردەوامیێ بدەنە شەڕی و ئالۆزیان بۆ بەرژەوەندیێن ئەمریکا ل رۆژهەلاتا ناڤین دروست بکەن، ل هەمبەر دا ئەمریکا ژی دڤێت ب داگیرکرنا گزیرتا خارک ئیرانێ نەچار بکەت خوە رادەست بکەت، ئانکۆ دێ شەڕ ب دژواری بەردەوام بیت).
مەیسەمی ئەو یەک ژی نەڤەشارت کو درێژکرنا شەڕی بۆ دەمێ سێ حەفتیێن دی نیشا ددەت ئەمریکا و ئسرائیل باش دزانن هەتا ئیران خوە رادەست نەکەت یان ژی رژێما نها نەهێتە گوهۆڕین دێ ئیران ئاریشەیان بۆ ئەمریکا دروست کەت، هەڤپەیمانێن ئەمریکا ل رۆژهەلاتا ناڤین چاڤەرێی سەرکەفتنا ئەمریکا نە، هەکە ئەمریکا نەگەهیتە ئارمانجا خوە و شەڕی بدەتە راگرتن دبیت وەلاتێن عەرەبی یێن هەڤپەیمانێن ئەمریکا تووشی مەترسیێن مەزن ببن، چونکی وی دەمی دێ نەچار بن پێداچوونێ د پەیوەندیێن خوە یێن ل گەل ئەمریکا دا بکەن و ژ بەر ڤێ یەکێ ژی ئەمریکا نەڤێت تشتەک وەسا روو بدەت و گۆت: (یا نها دیارە ئەمریکا دو رێ بۆ ئیرانێ هێلاینە، یان دڤێت خوە رادەست بکەت یان ژی دێ ئەمریکا و ئسرائیل رژێما نها ژناڤ بەن).
ل ئالیێ دی ئیسماعیل بەقایی پەیڤدارێ وەزارەتا دەرڤە یا ئیرانێ ژی دوهی دیار کر، وان بەری نها هۆشداری داینە وەلاتێن کەنداڤی کو نەبنە پشکەک ژ ستراتیژیا شەڕی و رێ نەدەن ئەمریکا وان وەلاتان بکار بینیت و نها ژی ئیران شەڕێ چو وەلاتەکێ ل رۆژهەلاتا ناڤین ناکەت و تنێ ئیران ئێرشی بنگەهێن ئەمریکا دکەت و هەتا شەڕ بەردەوام بیت هەموو بنگەهێن ئەمریکا دێ بنە ئارمانجێن ئێرشێن ئیرانێ و د رەوشا نها دا ئیرانێ نەڤێت شەڕی بدەتە راگرتن.
چاڤدێرێن سیاسی ژی وەسا دبینن راگرتنا شەڕی د رەوشا نها دا سەرکەفتنە بۆ ئیرانێ و دێ ئیران شێت د دەمەکێ نێزیک دا پێگەهێ خوە ل دەڤەرێ بهێزتر لێ کەت، ژ بەر ڤێ یەکێ ژی بەرپرسێن ئیرانێ ب چو رەنگەکێ بەرهەڤ نینن نها شەڕی بدەنە راگرتن، هەرچەندە هەتا نها زیانێن گەلەک مەزن ژی گەهشتینە ئیرانێ لێ ئیرانێ دڤێت هەموو کارتێن خوە ل دژی ئەمریکا و ئسرائیلێ بکار بینیت.
