د جڤاکێ ئێزدیان دا نابیت هندەک کەس هەڤژینیێ پێکبینن
بێوار حەمدی:
شارەزایەکێ جڤاکێ ئێزدیان بۆ ڕۆژنامەیا ئەڤرۆ دیار کر کو دناڤ جڤاکێ ئێزدیان نابیت هندەک کەس هەڤژینیێ پێک بینن، ژبەرکو خۆ بۆ خودێ دشکێنن و گۆت؛ لێ بگشتی هەڤژینی لدەڤ ئێزدیان لایەنەکێ گرنگ یێ جڤاکی یە.
چالاکڤان و شارەزایێ جڤاک و ئایینێ ئێزدیان هوگر حەیدو دیار کر کو پروسێسا هەڤژینیێ د جڤاکێ ئێزدیان دا لایەنەکێ گرنگ یێ جڤاکییە و دەرگەهێ هەڤژینیێ یێ ڤەکریە و گۆت: نابیت زەلام یێ بتنێ بیت داکو جڤاکەکێ گۆنجایی و ب رێکوپێک بهێتە ئاڤاکرن و دویر بیت ژ پەیوەندیێن نەرەوا، وەکو قەولێ مە یێ شەقە سەری دبێژیت؛ “ئەزنەبینم مێرێ بتنێ، کالێ بکە زنێ، مێرێ لبن حوکمێ ژنێ”.
هوگر حەیدو د بەردەوایا ئاخفتنێن خودا دیار کر دناڤ جڤاکێ ئێزدیان هندەک کەس هەنە کو نابیت ژیانا هەڤژینیێ پێک بینن، ژبەرکو ئەو خو بو خودێ دشکێنن و خزمەتا پەرستگەها پیرۆزا لالشێ و ئاخرەتێ دکەن و دەست ژ دونیایێ بەرددەن.
چالاکڤان هوگر حەیدو گۆت؛ ئەوکەسێن هەڤژینیێ پێک نەئینن دبێژنێ “شکەستی” لەوما قەولێ مەرسوما جەبێرە دبێژیت؛ “فەقیرا ئێکە چێکر، خو ژ خۆشی و لەزەتێن دنێ کر، ئەڤ دنیا هێلا و بەرب ئاخرەتێ کر”.
