ل رهمهزانێ پهیوهندیێن خێزانی ب هێز دكهڤن
دلڤین ڕەشید:
چالاکڤانەکا جڤاکی بۆ ڕۆژنامەیا ئەڤرۆ دیار کر کو رهمهزان هەیڤەکا تایبهته، ژبەرکو ددل و گیانێ مرۆڤاندا كارتێكرنهكا كویر پهیدا دبیت و گۆت؛ ڕەمەزان دەلیڤەیەکە بۆ بهێزکرنا پەیوەندیێن خێزانی.
ئیمان سهگڤان، چالاكڤانا جڤاكی دا دیار كر، د رۆژێن ئاسایێ دا، پتریا جاران ژیانا رۆژانە یا ئەندامێن خێزانێ ب كاری و دهوامێ و خواندنێ ڤە دبوریت و كێمتر دهلیڤەیا ل ههڤ كومبونێ و دانوستاندنێ پهیدا دبیت و گۆت؛” ئهڤ دویراتیە هێدی هێدی پهیوهندیێن خێزانی لاواز دكهت، بهلێ د هەیڤا رهمهزانا پیرۆزدا پەیوەندیێن خێزانی بهێزتر لێ دهێن، رەمەزان خێزانێ لسهر ئێك سفرە كوم دكهت.
ئیمانێ دیار کر ژی، ل دهمێ فتارێ، ههموو ئهندامێن خێزانێ ههست ب دهمهكێ ههڤپشك و پیرۆز دكهن، خوارن و دانوستاندن و ڤیان ل ڤی دهمی دا پهیدا دبن، ئهڤ جورێن كومبونان د مهها رهمهزانا پیرۆزدا ژ بۆ هندێ نینه كو زكێ برسی تێر بكهن، بهلكو ژ بۆ تێركرنا دلی و روحێ یه ژی.
چالاكڤانا جڤاكی، ئهو چهند ژی دیار كر، هەیڤا رهمهزانا پیرۆز دهرفهتهكه بۆ فێربونا بها و رەوشتی، دایك و باب دشێن د ڤێ مههێ دا نمونهیهكا باش بن ژ بۆ زارۆكێن خۆ كو تێدا فێری گیانێ رێزگرتنێ و هاریكاریێ و ئارامیێ ببن و گۆت؛ زارۆك ژی وهكو بهشهك ژ جڤاكی گرنگه بهێنە پەروەردەکرن و فێرکرن و ههست ب گرنگیدانا خێزانێ بكهن، چونكی د رۆژانێن ئاسایی دا دایک و باب ژبهر ئالوزی و مژویلیێن ژیانی نهشێن ب ئاسانی ڤێ چهندێ ژ بۆ زارۆكان ڤهگوهوێزن.
ئیمانێ د بەردەوامیا ئاخفتنێن خۆدا دیار کر، هەیڤا رهمهزانێ دهلیڤهیهكه بو هندێ کو ئهم بشێین ئەو ئاریشەیێن د خێزانێ دا هەین چارهسهر بكهین و گۆت؛ چونكی دهمێ خێزان لسهر ئێك سفره کوم دبیت، ئهڤه دهمهكێ ئارامه ژ بۆ دانوستاندنێ و ئهم دشێین بێ ترس و تورهیی و ب ئارامی و ڤیان دگهل ئێكودو دانوستاندنێ بكهین و ئاریشەیان چارهسهر بکەین.
چالاكڤانا جڤاكی دیار کر، رهمهزانا پیرۆز وێنهیهكی رون نیشان ددهت كو هەکە خێزان دهمەکێ کێم ژی تهرخان بكهت ژ بۆ دانوستاندن و لێكتێگههشتنێ، ئهڤ چهنده دبیته ئەگەرێ ب هێزكرنا پهیوهندیێن درێژخایهنێن خێزانێ و گۆت؛ د ڤێ هەیڤا پیرۆزدا ئهم فێر دبین كو خێزان بنچینهیێ ژیانێیه و پاراستن و ب هێزكرنا وێ پێدڤیهكا سهرهكیه ژ بۆ ئارامی و بهختهوهریا ههموو ئهندامێن خێزانێ.
