بەردەوامـیا شـەڕی دێ رۆژهـەلاتا ناڤین تووشـی کـارەساتێن مـەزن کـەت
چاڤدێرێن سیاسی دیار دکەن، بەردەوامیا شەرێ نها دێ بیتە ئەگەرێ کارەساتێن مەزن بۆ رۆژهەلاتا ناڤین، چونکی هنارتنا پەترۆلێ بۆ بازارێن جیهانێ هاتیە راگرتن و هەروەسا مەترسی ل سەر دابینکرنا پێدڤیاتێن ژیانێ دێ دروست بن.
فەهیم تاشتەکین بسپۆرێ کاروبارێن رۆژهەلاتا ناڤین دیار کر، کوشتنا عەلی لاریجانی و چەندین بەرپرسێن دی یێن ئیرانێ نیشا ددەت کو ئەمریکا و ئسرائیل ب هەموو شیانێن خوە یێن کار دکەن دا رژێما نها یا ئیرانێ ژناڤ بچیت یان ژی خوە رادەست بکەت، ل هەمبەر دا ئیران ژی ب هەموو شیانێن خوە دڤێت خوە راگریت و زیانێ بگەهینتە بەرژەوەندیێن ئەمریکا، ئیران رێ نادەت پەترۆلا گەلەک وەلاتان بچیتە بازارێن جیهانێ و ل ئالیێ دی ژ بەر شەڕی مەترسی ل سەر ئابوورا وەلاتێن رۆژهەلاتا ناڤین دروست بوویە و دێ کاریگەریا خوە ل سەر جیهانێ ژی هەبیت.
جەمال نەجاری شارەزایێ کاروبارێن ئیرانێ ژی دیار کر، ئەمریکا و ئسرائیل ب چو رەنگەکێ شەڕی نادەنە راگرتن، هەکە نها دانوستاندنەک د ناڤبەرا ئەمریکا و ئیرانێ دا هەبیت ژی بێگومان دێ ئەمریکا داخواز ژ ئیرانێ کەت دا خوە رادەست کەت، چونکی ترامپی بەری دو رۆژان ژی دیار کر هەتا ئەو نەگەهنە ئارمانجێن خوە دێ شەڕ بەردەوام بیت، ئارمانجا ئەمریکا ئەوە یان دڤێت رژێما نها یا ئیرانێ خوە رادەست بکەت یان ژی دێ ژناڤ بەن، ل هەمبەر دا ئیران ژی هەموو کارتێن هەی ل دژی بەرژەوەندیێن ئەمریکار بکار دئینیت و گۆت: (هەکە شەڕ ب دژواری بەردەوام بیت وەلاتێن ئەندامێن ناتۆ ژی دێ نەچار بن هاریکاریا ئەمریکا کەن، چونکی ئەمریکا گەلەک کارتێن بهێز هەنە دێ ل دژی وان وەلاتان بکار ئینیت و ئەو نەچارن گەمیێن شەڕی رەوانەی رۆژهەلاتا ناڤین بکەن و بێگومان دژواربوونا شەڕی دێ کاریگەریا خوە یا گەلەک خراب ل سەر ئابوورێ وەلاتێن رۆژهەلاتا ناڤین هەبیت، چونکی نها هنارتنا پەترۆلێ بۆ بازارێن جیهانێ هاتیە راگرتن).
عەبدولا حیجاب چاڤدێرێ سیاسی یێ رۆژهەلاتێ کوردستانێ ژی دیار دکەت، ئیران نها گەلەک لاواز بوویە، رێبەرێ ئیرانێ و گەلەک فەرماندارێن سەربازی هاتینە کوشتن، عومبارێن چەکی یێن ئیرانێ هاتینە ژناڤبرن و ئیران د رەوشەکا گەلەک خراب دایە، لێ دیسان ژی ئیرانێ دڤێت هەتا ژ دەستێ وێ بهێت زیانێ بگەهینتە بەرژەوەندیێن ئەمریکا ل رۆژهەلاتا ناڤین و ژ بەر ڤێ یەکێ ژی ئەم دبینین یا ژ دەستێ ئیرانێ دهێت ئەنجام ددەت و گۆت: (وەسا دیارە ئەمریکا و ئسرائیل دخوازن رژێمێ گەلەک لاواز بکەن دا پاشی خەلک دەست ب خوەنیشادانان بکەن و رژێما نها ژناڤ ببەن، لێ دبیت ئەو یەک پێدڤی ب دەمی بیت، خالا نها گرنگ بەردەوامیا شەڕی دێ کاریگەریا خوە یا گەلەک خراب ل سەر ژیانا خەلکێ ئیرانێ هەبیت و هەروەسا دێ بیتە ئەگەرێ قەیرانێن مەزن بۆ هەموو رۆژهەلاتا ناڤین، چونکی ئیران ژی بەردەوام ئێرشی ژێدەرێن ئابووری یێن وەلاتێن هەڤپەیمانێن ئەمریکا ل رۆژهەلاتا ناڤین دکەت و دخوازیت زیانێن مەزن بگەهینتە ئابوورێ وەلاتێن عەرەبی کو هەڤپەیمانێن ئەمریکا نە).
مەنسوور عەزیزی چاڤدێرێ سیاسی ژی دیار دکەت، ئەمریکا و ئسرائیل نەشێن نها شەڕی بدەنە راگرتن، چونکی ئیران نها وەکو مارەک بریندار لێ هاتیە و هەکە هەموو مەرجێن ئەمریکا قەبوول نەکەت پاشی دشێت ئاریشەیێن گەلەک مەزن بۆ ئەمریکا و ئسرائیلێ دروست بکەت، ژ بەر ڤێ یەکێ ژی ئەم دبینین نها ئەمریکا و ئسرائیل ب هەموو شیانێن خوە ئێرشی ئیرانێ دکەن و ڤێ دووماهیێ ژی کوشتنا عەلی لاریجانی کەسێ هەری گرنگ پشتی رێبەرێ ئیرانێ نیشا ددەت کو شەڕ دێ ب دژواری بەردەوام بیت و گۆت: (ئیران هەموو کارتێن هەی بکار دئینیت و دڤێت ل گەل خوە قەیرانەکا مەزن ژی بۆ رۆژهەلاتا ناڤین دروست بکەت، بەردەوامیا شەڕی دێ بۆ هەموو رۆژهەلاتا ناڤین ئەنجامێن خوە یێن خراب هەبن، لێ هەکە رژێما ئیرانێ خوە رادەست بکەت دبیت وی دەمی رێ ل دروستبوونا قەیرانێن مەزن بهێتە گرتن).
گەلەک ژ چاڤدێرێن سیاسی ل ئەمریکا و ئۆرۆپا ژی وەسا دبینن ئەمریکا و ئسرائیلێ شیاینە دربێن مەزن ل ئیرانێ بدەن و ترامپی نەڤێت شەڕی بدەتە راگرتن و ل ئالیێ دی ل ئیرانێ ژی کەس نینە بشێت بەحسێ دانوستاندنان و راگرتنا شەڕی بکەت، چونکی پشتی کوشتنا خامنەیی گەلەک زەحمەتە بەرپرسەک ل ئیرانێ بشێت بەحسێ دانوستاندنان ل گەل ئەمریکا بکەت.
