بەری دادگەهێ کچ ل مالا شێخێن شێخ حەسەن دهێنە مەهر کرن
بێوار حەمدی:
دەمێ ژیێ کچ و کورێن ئێزدیان دبیتە 18 سال بەحسێ ژن ئینان و شوکرنێ گەرم دبیت، شارەزایەکێ جڤاک و ئایینێ ئێزدیان ژی گۆت: بەری کچ و کور بچنە دادگەهێ پێدڤییە ل مالا شێخێن شێخ حەسەن بهێنە مەهرکرن.
هوگر حەیدو، چالاکڤان و شارەزایێ جڤاک و ئایینێ ئێزدیان د دیدارەکێ دا بۆ ڕۆژنامەیا ئەڤرۆ دیار کر کو ژن ئینان و شوکرن دوو قوناغێن تەمامکەرێن ئێکن لدەڤ ئێزدیان و گۆت: دەمێ کچ و کور بونە 18 سال ل وی دەمی بەحسێ ژن ئینان و شوکرنێ گەرم دبیت.
هوگر حەیدو ئاماژە ب وێ چەندێ ژی کر کو لدەف ئێزدیان جاران کور دشیا ب ئاشکرایی بەحسێ ئەڤینا خوە بۆ نێزیکێن خوە بکەت، لێ کچێ تنێ بۆ هەڤالێن خوە دگۆت. هەروەسا دەما دهاتە خواستن ژی، کچێ بۆ رێزگرتن ل بڕیارا خێزانێ دگۆت، ب کەیفا دایک و بابێن منە.
ناڤهاتی ئەو چەندە ژی دا زانین، مەهرە بڕینا کچ و کوران دەسپێدکەت ژ مالا شێخێن شێخ حەسەن دگەل دوو دیدەڤانا و ئێک ژ شێخان دێ پرسیارا هەردویان کەت ئەگەر بەرسڤا وان رازیبون بیت دێ کەفیکەکێ کەتە دەستێ وان و دوعایا مارەبڕینێ بێژیت و دێ پیرۆزباهیان وان کەت.
چالاکڤانی دیار کر ژی، پشتی مەهرەبڕینێ لدەڤ شێخان دێ تومارەکا تایبەت نڤیسن دگەل فورمەکا نڤیسی و مور و ئیمزا کری و دێ دەنە دەستێ وان و پاشی دێ چنە دادگەهێ داکو مەهرەیا خو بکەنە فەرمی و قوناغێن پشتی مەهرەبڕینێ ژی ل مالا زاڤای دهێنە ئەنجامدان.
