پشتی ب دووماهی هاتنا ئالۆزیێن دەڤەرێ گەشتیار دێ هێنە جهێن گەشتیاری
قائید میرۆ
پەیڤدارێ دەستەیا گشتیا گەشت و گوزارێ ئاشكراكر، بەرهەڤی بۆ ئاسایی كرنا رەوشا گەشت و گوزارێ دهێتەكرن و دبێژیت، چەندین كۆڕبەند و چالاكی دگەل كۆمپانیێن گەشتیاری دێ بهێنە ئەنجامدان بۆ ڤەگەڕاندنا گەشتیاران و سەرەڕای ئالۆزیێن دەڤەرێ رەوشا هەرێما كوردستانێ ل پڕانیا وەلاتێن دەڤەرێ باشترە بۆ هاتنا گەشتیاران.
ئیبراهیم عەبدولمەجید، پەیڤدارێ دەستەیا گەشت و گوزارێ بۆ رۆژناما ئەڤرۆ دیاركر» پشتی ئالۆزیێن دەڤەرێ دهێتە چاڤەڕێكرن جارەكادی گەشتیار سەرەدانا هەرێما كوردستانێ بكەن، چونكە رەوشا هەرێما كوردستانێ هەڤبەركرن دگەل وەلاتێن دەڤەرێ تەنا ترە و باشترە، بتایبەتی پڕانیا گەشتیارێن هەرێما كوردستانێ ل نافخۆیا ئیراقێ دهێن و مینا وەلاتێن جیهانێ نینە كو تنێ گەشتیارێن بیانی نە، مە بڤێت و نەڤێن شەڕۆ ئالۆزیان كاریگەریێن خۆ هەنە لسەر كەرتێ گەشت و گوزارێ، بەلێ ئەم یێ كار دكەین بۆ پەیداكرنا باوەریێ بۆ گەشتیاران هەتا سەرەدانا هەرێمێ بكەن و ئەم باوەرین كەرتێ گەشتیاری ل هەرێما كوردستانێ بەریا وەلاتێن دەوروبەر و دەڤەرێ دێ جارەكادی گەشێ كەت، چو ئامارێن دروست بەردەست نینە لدۆر كێم بوونا رێژا گەشتیاران ددەمێ شەڕێ ئیران و ئەمریكا، بەلێ شەڕۆ ئالۆزی زێدەتر د هەیڤا رەمەزانێ دابوون، هەموو سالەكێ ژی ل هەیڤا رەمەزانێ كێمتر گەشتیار سەرەدانا جهێن گەشتیاری دكەن، نوكە ئەم یێ بەرهەڤیان دكەین بۆ قۆناغا پشتی شەڕی، هەتا كەرتێ گەشتیاری ڤەگەڕیت بۆ رەوشا بەرێ و ئاسایی ببیت و راستە رێ ببیت.
پەیڤدارێ دەستەیا گەشت و گوزارێ گۆتژی» ل هەرێما كوردستانێ 600 كۆمپانی و نڤیسینگەهێن گەشتیاری هەیە و هەماهەنگی دناڤبەرا كۆمپانیێن گەشتیاری و دەستەیا گشتیا گەشت و گوزارێ هەیە، لەوڕا ئەم دخوازین ب رێیا ئەڤان كۆمپانیێن گەشتیاری، هژمارەك كۆڕبەند و كۆمبوونان بكەین ب بەرهەڤبوونا كۆمپانیێن ئەڤی بیاڤی، مەرەم ل ئەڤان چالاكیان ڤەڕەڤاندنا ترسێ یە ل دەف گەشتیاران و ئاسایی كرنا رەوشا گەشتیاریە ل هەرێما كوردستانێ، دگەل كەرتێ تایبەت دێ كار بۆ ڤەگەڕاندنا گەشتیاران بكەین، ڤەكرنا فڕۆكەخانەیان و دەستپێكرنا گەشتێن ئاسمانی ژی كاریگەری لسەر رەوشا گەشت و گوزارێ هەیە.
ئیبراهیم عەبدولمەجید ئانماژەكر» پلانا ستراتیژی و دۆم درێژ هەیە بۆ گەشەپێدانا كەرتێ گەشت و گوزارێ، ئەم شیاینە تنی سەردەمێ كابینا نەهێ ب سەرۆكایەتیا مەسروور بارزانی ب گوژمێ زێدەتری حەفت ملیارو 500 ملیۆن دۆلاران پڕۆژە هاتینە ئەنجامدان، ژێرخانا گەشتیاری پێشڤەچوونێن بەرچاف بخۆڤە دیتیە، پێنگاڤێن حوكمەتا هەرێما كوردستانێ ژی بەردەوامن بۆڤێ چەندێ پڕۆژێن گەشتیاری بهێنە زێدەكرن و هەر چوار وەرزێن سالێ بەردەوام گەشتیار سەرەدانا هەرێما كوردستانێ بكەن، واتە تنێ ددەمێ هەلكەفتان گەشتیار نەهێن بەردەوامبن هەموو وەرزێن سالێ، هەروەسا ب رێیا پشكداریێ د چالاكیێن جیهانی یێن كەرتێ گەشت و گوزارێ زێدەتر هەرێما كوردستانێ ژلایێ گەشتیاری بدەینە نیاسین.
