د چار هەیڤێن بۆری دا نێزیكی حەفت مەتران ئاستێ ئاڤا بن ئەرد بلند بوویە
سندس سالح سلێڤانەیی:
رێڤەبەرێ ئاڤا بن ئەرد ل پارێزگەها دهۆكێ، دیاركر كو د ئەڤ سالە رێژەیا هاتنا بەفرۆ و بارانان گەلەكا باشبە و ئاستێ بلندبوونا ئاڤا ژێر عەرد ژی گەلەك باشتر لێ هاتیە، ب تایبەت ژ دچار هەیڤێن بۆری دا و ئەم دگەشبینین دێ هیشتا باران د بەردەوام بن و ئاستێ ئاڤا بن ئەردی ژی دێ هێشتا بلندتر لێ هێت.
یەحیا سلێمان، رێڤەبەرێ ئاڤا بن ئەردی ل پارێزگەها دهۆكێ، گۆت: سوپاس بۆ خودێ د ئەڤ سالە دا رێژەیا هاتنا بەفرۆ بارانان ل سنۆرێ پارێزگەها دهۆكێ گەلەكا باش بوو، لەورا دشێم بێژم بارانێن ئەڤ سالە قەرەبوویا كێم بارانیا سالا 2020 هەتا سالا 2025 كریە، ب تایبەت ژی بۆ ئاڤا ژێر زەڤی، یانژی بێژین ئاڤا ژێر عەرد، چنكو ل سالا 2020 هەتا 2025 ژئەگەرێ گوهۆڕینا كەشوهەوای ئاستێ ئاڤا بن ئەردی گەلەك كێم بوو، ئانكو (11) مەتر و نیڤا ئاستێ ئاڤا ژێر زەڤی كێم ببوو، ب تایبەت ژی ل 2022 هەتا 2025 نێزیكی حەفت مەتر و نیڤان كێم ببوو، لێ وەكو مە گۆتی بارانێن ئەڤ سالە رەوش گوهۆڕی و رێژە بلندتر لێ هێت و هەتا نوكە نێزیكی هزار ملیمێن بارانێ هاتینە و ئەڤە ژی رێژەیەكا گەلەك باشە و ئەز دشێم بێژم بتنێ د چار هەیڤێن بۆری دا نێزیكی حەفت مەتران ئاستێ ئاڤا بن ئەردی بلند بوویە و ئەڤ چەندە ژی جهێ دلخۆشیا مە هەموویانە و ئەم دگەبینین دێ باران هێشتا بارن و ئاستێ ئاڤا بن عەرد ژی دێ هێشتا زێدەتر لێ هێت.
یەحیا سلێمان، رێڤەبەرێ ئاڤا بن ئەردی ل پارێزگەها دهۆكێ، هێشتا گۆت: دەمێ بارانێن هێدی و رحەت دهێن بۆ بلندبوونا ئاستێ ئاڤا بن ئەردی گەلەك باشترە، چنكو ئاڤ دچیتە بن عەردی، لێ هەكە باران گەلەك بهێن و دبۆشین گەلەك مفا ژێ ناهێتە دیتن، چنكو ئاڤ دچیتە جادا و دبنە لافاو ل وی دەمی دبیتە ئاڤا سەر عەرد و چو مفا ژێ ناهێتە وەرگرتن.
ل دووماهیێ ل دۆر كولانا بیرێن ئاڤێ (یەحیا سلێمان) رێڤەبەرێ ئاڤا بن ئەردی ل پارێزگەها دهۆكێ، گۆت: ڕاستە بەری چەند سالان هندەك بیر ب شێوەیەكێ نەیاسای ژلایێ هندەك كۆمپانیێن سوری ڤە دهاتنە كولان، لێ ئەڤە چەند سالن ئەو چەندە نەمایە و 100/100 كونترۆل ل سەر هاتیە كرن و ب چو رەنگان ناهێلنە كولان، لێ هەكە بۆ جهەكی گەلەكا پێدڤی بوو، هندەك مەرج هەنە و ل دووف رێكارێن یاسایی دێ داخوزا كولانا بیرێ هێتە كرن.
