ژبەر خرابیا رەوشا ئیراقێ ئەرمەن ژ بەغدا هاتینە پارێزگەها دهۆكێ
لەزگین جوقی
كەساتیەكێ ئەرمەن و ئەندامی بەرێ یێ پەرلەمانێ كوردستانێ راگەهاند، حۆكمەتا هەرێما كوردستانێ گەلەك گرنگی ب ئەرمەنان دایە. بەری نوكە ئەرمەنان ب تنێ ئێك كەنیسە هەبوو، لێ نوكە ب هەڤكاری و پشتەڤانیا حكوومەتا هەرێما كوردستانێ ئەرمەنان پێنج كەنیسە هەنە و هژمارا ئەرمەنان ل هەرێما كوردستانێ ب تایبەت پارێزگەها دهۆكێ و ئیدارا سەربەخۆییا زاخۆ زێدەبوویە.
یەروانت ئەمینیان، ئەندامی بەرێ یێ پەرلەمانێ كوردستانێ زێدەتر گۆت: ژبەر خرابیا رەوشا عێراقێ گەلەك ئەرمەن ژ بەغدا هاتینە پارێزگەها دهۆكێ و هندەك خێزانێن ئەرمەنان ل هەولێر ئاكنجیبووینە و ئەو ئەرمەنێن كاری بازرگانی دكەن ل ئیراقێ نەماینە هەموویان مالێن خۆ ئێناینە هەولێرێ نوكە هەتا پێنج هزار كەسێن ئەرمەن ل هەرێما كوردستانێ ب تایبەت ل دهۆكێ و هەولێرێ ئاكنجینە و حۆكمەتا هەرێما كوردستانێ هەمی مافێن مە دابین كرینە و بەردەوام خزمەتێ پێشكیشی خەلكێ مە دكەت.
تەكەزكر، بەرێ ب تنێ ئەرمەنان كەنیسەك هەبوون ئەوژێ ل زاخۆ بوو، لێ نوكە ئەرمەنان پێنج كەنیسە هەنە و هژمارا خەلكێ مە زێدەبوویە كوردستان دەڤەرەكا گەلەك ئارامە بۆ ئەرمەنان و هەمی پێكهاتێن دەڤەرێ پێكڤەدژێن ئەڤە نموونەكا گەلەك باشە ئەم هەمی وەكو برا دگەل ئیك دژین.
زێدەتر گۆت: خەلكێ مە یێ ئەرمەن ل مووسل نەماینە ژبەر نەبوونا ئارامی كوبەری سالا 2014ێ گەلەك خێزانێن ئەرمەن موسل هەبوون، لێ نوكە نەماینە ب تنێ چەند خێزانێن كێم چووینە مووسل وەكو دی ئەرمەن ل دهۆكێ و زاخۆ ماینە نەزڤرینە مووسل.
