٨٠ هزار پەرتووك دێ ل پەرتووكخانەیا زانكۆیا دهۆكێ بنە ئۆنلاین
هەرهین محەمەد:
د سەردەمێ تەكنەلۆژیا و لەزاتیێ دا، پەرتووكخانە ژی پێدڤی ب گوهۆڕینێن بنەڕەتی نە دا كو ل گەل پێدڤیێن نەوەیێ نوو یێ خویندەڤانان بگونجن. پەرتووكخانا ناڤەندی یا زانكۆیا دهۆك ژی وەك ئێك ژ گرنگترین ناوەندێن زانستی ل دەڤەرێ، پێنگاڤێن مەزن بەرەڤ سیستەمەكێ پێشكەفتی یێ ئەلیكترۆنی هاڤێتینە.
د. كاروان جەعفەر عەبدولڕەحمان، رێڤەبەرێ پەرتووكخانا ناڤەندی یا زانكۆیا دهۆك بۆ ئەڤرۆ گۆت: نوكە ل هەموو جیهانێ پەرتووكخانە بەرب سیستەمێ ئۆنلاین دچن و مفا وەرگرتن ژ پەرتووكێ ب شێوازێ فیزیكی یێ كێم دبیت و نوكە مە سیستمەكێ ئۆنلاین یێ نایاب چێكریە بۆ نموونە مە حەفت ژوورێن بێدەنگ (Quiet Zones) دابینكرینە كو قوتابی دشێن ب رێكا ئۆنلاین جهێ خۆ حجز بكەن. هەروەسا دوو ژوورێن كۆمبوونێ (Meeting Rooms) و دوو هۆلێن سمینار و وۆركشۆپان مە یێن ئامادەكرین ئەڤە هەموو ب رێكا ئەپلیكەیشنەكێ دهێنە برێڤەبرن، دا كو قوتابی بزانیت كێ و ل چ دەمەكی جهەك حجز كریە.
ئەو چەندە ژی گۆت: مە مالپەرەكێ گشتی (Public Website) یێ هەین كو هەموو رێنمایی و یاسایێن پەرتووكخانێ، بابەتێن قەرەبووكرن و سزایان تێدا هاتینە دیاركرن و هەروەسا مە نوزدە پەرتووكخانەیێن دی یێن بسپۆر (Specialized Libraries) ل كۆلێژێن زانكۆیێ هەمی كرینە ئۆنلاین. نوكە هەر قوتابیەك دشێت ب رێكا مالپەرێ مە بگێهیتە هەموو پەرتووكخانەیێن كۆلێژان و دیسان مە پڕۆژەیێ (Indexing) یێ دەستپێكری، كو ب نێزیكی هەشتێ هزار پەرتووك دێ بنە ئۆنلاین و قوتابی دشێت ب تنێ ب گەریانێ (Search) پەرتووكا خۆ ببینیت.
زێدەتر گۆت: نوكە ئەم یێ كار ل سەر دكەین وان هەمویان بكەینە دیجیتال و ئۆنلاین دا كو ڤەكۆلەر و قوتابی ب ئاسانی مفای ژێ وەربگرن و ب رەنگەكێ گشتی نێزیكی ٨٠ هزار پەرتووكان مە یێن هەین. ئەڤ هژمارە هەر حەفتیێ یا د زێدەبوونێ دایە، چونكو مە سیستەمێ دیاریا (Hadiya)، گوهۆڕینا پەرتووكان دگەل ناڤەندان، و كڕینا پەرتووكان ژ پێشەنگەهێن نێڤدەولەتی یێ هەین و گۆت: زمانێن سەرەكی كوردی، عەرەبی و ئینگلیزی نە وهەروەسا مە گۆشەیەكا تایبەت یا هندی (India Corner) ژی هەیە كو ب هەماهنگی دگەل كۆنسولخانەیا هندستانێ هاتیە دابینكرن.
هەروەسا گۆت: ئاستەنگا مە یا سەرەكی بابەتێ (Online Databases) و ئابوونەیا (Subscription) سایتێن جیهانی یە وەكی (Web of Science, Scopus, Science Direct). ئەڤە پارەكێ زۆر دڤێت، لێ بۆ ڤەكۆلەرێن مە یێن ماستەر و دكتۆرایێ گەلەك یێ پێدڤی یە، چونكو زانست ب تایبەت د بوارێن پزیشكی و IT دا زوی دهێتە گوهۆڕین و دڤێت هەر پێنج سالان جارەكێ ژێدەرێن نوو بهێنە بكارئینان.
