فاتۆیا پێخواس
محەمەد عەبدولا
هەموو سپێدەییان شمکا خوە یا نوو دئینا دەرێ و پەڕۆکەک تەڕ دکر و باش پاقژ دکر، پاشی ب دەهمەنێن کراسێ خوە هشک دکر و دگۆت: وەی پا تو یا جوانی، ب خوەدێ مخابنە مرۆڤ تە بکەتە پێ خوە و دانیتە د ناڤ تۆزێ و تەقنێ دا، یا باش ئەوە چپکێن تەقنێ نێزیکی تە نەبن.. پاتەیەک تێپێچا و دانا سەر دۆشکێ ل بەر دەرێ خانی و ب پێخواسی ژ مال دەرکەڤت و چوو دەرێ کۆلکێ مریشک و عەلۆکان ئەوێن کو مینا کەرەکێ پەزێ بۆش کۆلان هەموو ڤەدگرت و دەنگێ وان ل گوندی دەنگڤەددا ڤەکر و برنە د ناڤ ئەو مێرگا ب ڕەخ گوندی ڤە داکو بچەرن. هەر مالەکێ ل گوندی چەند بزنەک، یان چاڤرییەک هەبوون، لێ فاتۆیێ ژ کەوالێن گوندیان پتر مریشک و عەلۆک هەبوون.. هەموو ڕۆژان وەک شڤانەکی چاڤدێریا عەلۆک و مریشکێن خوە دکر و دبرنە ڕەخێن گوندی داکۆ ب چەرن، نیڤرۆیان ژی وەکی کەوالێن گوندی دبرنە بن وێ دارا کو دكەڤتە هنداڤی جۆیا ئاڤێ داکو بێهنا خوە ڤەدەن و د مەخەل بچن، ژیانا وێ و مالباتا وێ ل سەر فرۆتنا وان و هێکێن وان بوو. ناڤودەنگێن مریشک و عەلۆکێن وێ ل دەڤەرێ هەمیێ بەلاڤ بووبوون..
بنێ پێیێن وێ هندەک کەلشتە کەتبوونێ تبلێن مرۆڤی د چوونە تێ دا، چەرمێ بنێ پێیێن وێ مری بوو دویپشکی ژی پێڤەدابا ئاگەھ ژێ نە دبوو، ب دەهان زلک و داسی تێدا مابوونە ئاسێ و وێ ئاگەھ ژێ نەبوو، پێیێن وێ مەزن و پەحن بووبوون ژ بەر پێخواسیێ، دەمێ ب ڕێڤە دچوو و پێیێن خوە بلند دکرن و دادنانە سەر ئەردی نیڤ گەزێ تۆز بلند د بوو، شوون پێیێن وێ و یێن هرچان وەک هەڤ بوون، مرۆڤی نە د زانی کو شوون پێیێن مرۆڤانە، باوەر ناکەم هەتا کو ژییێ وێ گەهشتیە ڤێ قووناغێ ژی وێ پێلاڤ، یان شمک کربنە پێیێن خوە، هندەک جاران ژی ژ بەر لۆمەیی و گۆتنێن گوندیان شمکێن خوە دکرنە دەستێن خوە و د چوو سەر کارێ خوە.. گەلەک جاران کچا وێ یا ئێکانە یا کو ئێک ژ جوانترین کچکێن گوندی و د قووناغا سنێلەییێ دا، یا کو هزرەتا تۆلازێن گوندی هەمییان ئەو بوو بتنێ جارەکێ ژی سلاڤی وان بکەت، ژبەر تڕانە و گۆتنێن گوندیان ب ڕۆندک و گریڤە ژ ناڤ هەڤالان ڤەگەڕیا مال، ل داویێ ژی د شەرمان دا ئێدی یاری و هەڤال ژی هێلان.. ل هەموو دیوانان و روونشتنان، سوحبەت و ئاخفتنێن گوندیان ل سەر فاتۆیێ بوون، گەلەک جاران روونشتن و دیوانێن خوەش هەبوون، لێ هەڤژینێ فاتۆیێ ژ شەرمان دا نە د چوو وان دیوانان، ئێدی پسمامک و برایێن وێ ژی نە دشیان ب ساناهی ل ناڤ گوندی و ل گەل هەڤالێن خوە بگەڕن..
بێهنا برایێ وێ یێ مەزن چک بووبوو و گەهشتبوو دفنا وی، ب گەف و گازندە و تووڕەبوونێن وی، فاتۆیێ موویەک ژی ژ خوە کێم نەکربوو و خوە ب سەرڤە نەدبر، هەر چەندە ئەو برایێ وێ ب خوە ژی دناڤ گوندی دا نیڤ زڕتەکەک بوو، گەنجێن گوندی هەموو ژێ د ترسیان و هەر بڕیارەکا وی دا با بێی گیرۆبوون. هەموو هەڤالێن وی بجھدئینا، سپێدە زوو بوو، برایێ وێ ل سەر بەربانکی یێ روونشتی بوو، فاتۆیێ عەلۆک و مریشکێن خوە بەردان و تۆز ل پشت خوە بلند کر، برایێ وێ سەرێ خوە نزم کر و دارکەک د دەستی دا بوو هندەک خیچ و مویچ ل سەر ئەردی چێدکرن و چوو بوو د هزرێن فاتۆیێ دا: ئێدی ئەز نەشێم خوە پتر ڕاگرم، هەتکا بنەمالا مە چوو، دیوان و خۆشی و یاری ژ مە چوون، ئەم یێن بووینە پێتڕانکێن گوندیان، دڤێت ئەز توخیبەکێ بۆ ڤێ فاتۆکێ دانم.
بلەز خوە د بەربانکی دا هاڤێت و ژ گوندی دەرکەڤت، نێزیکی دەھ گەزان رێیا فاتۆیێ هەموو ب تاکێن ستری و کەلەمێن گوهیشکان یێن کو ژ تبلەکێ د درێژتر و وەکی شووژنان د تووژ، د بن تۆزێڤە مینا خەڤک و تەلهێن بۆ کێڤرووشکان دهێنە دانان ڤەشارتن و ب تۆزێ نخاڤتن، سەرکێن وان هەمما د دیار بوون، ئێکەم پێنگاڤا فاتۆیێ هاڤێتی خرچێن ژ پێیەکێ وێ هات، پێیێ دی ژی هاڤێت و قیژیێن وێ بلند بوون و ل دووڤ کماخێن خوە ب ناڤ کۆما کەلەمێن گوهیشکان کەڤت و د خوینێ وەر بوو، ژ وێ ڕۆژێ و هەتا ڕۆژا فاتۆ چوویە رەحمەتێ ژی، ڕۆژەکێ بتنێ ژی بێی پێلاڤ ژ مال دەرنەدکەڤت..
