سـووریا و لـوبنان دەست ب قووناغەکا نوو دکـەن
سەرۆک وەزیرێن لوبنانێ سەرەدانا شامێ کر و ل گەل سەرۆک کۆمارێ وی وەلاتی کۆمبوو و د کۆمبوونێ دا بەحسێ ئالۆزیێن ل سەر سنوری، بابەتێ حزبوللا لوبنانێ و باشکرنا پەیوەندیێن هەر د وەلاتان هاتە کرن و سەرۆک وەزیرێن لوبنانێ دیار کر ئەو بەرهەڤن ل گەل سووریێ دەست ب قووناغەکا نوو بکەن و هەموو پرسێن هەی چارەسەر بکەن.
دەزگەهێن راگەهاندنا سووریێ ژی دیار دکەن د کۆمبوونێ دا ئەحمەد شەرع داخواز ژ نەواف سەلام سەرۆک وەزیرێن لوبنانێ کریە کو رێگریێ ل بزاڤێن حزبوللا لوبنانێ بکەت دا حزبوللا ل سەر سنورێ وان ئالۆزیان دروست نەکەت و هەروەسا سووریێ یا بەرهەڤە د بیاڤێن سیاسی و ئابووری دا پەیوەندیێن خوە ل گەل لوبنانێ باش بکەت.
چاڤدێرێن سیاسی ژی دیار دکەن، لوبنانێ دڤێت خوە ژ کاریگەریا سیاسەتا ئیرانێ قورتال بکەت و نەواف سەلام دڤێت پەیوەندیێن خوە ل گەل هەموو وەلاتێن عەرەبی ب تایبەتی ژی یێن نەیارێن ئیرانێ باش بکەت.
