بەرپرسـێن ئیرانێ ژ خوەنیشـادانێن نوو دترسن
بەرپرسەکێ ئیرانێ کو نەخواستیە ناڤێ وی بهێتە ئاشکرا کرن بۆ ئاژانسا رویترز یا نووچەیان دیار کریە، رەوشا ئابووری یا ئیرانێ گەلەک خرابە و ژ بەر شەڕێ چل رۆژان یێ د ناڤبەرا ئیرانێ ل گەل ئەمریکا و ئسرائیلێ دا زیانێن گەلەک مەزن گەهشتینە ژێدەرێن وزێ ل ئیرانێ و ژ بەر ڤێ یەکێ ژی هاڤینەکا گەلەک دژوار چاڤەرێی ئیرانێ یە.
هەمان بەرپرسی ئەو یەک ژی دیار کریە، ژ بەر دۆرپێچا دەریایی یا ل سەر ئیرانێ نها بهایێ کەلوپەلان ژی گەلەک گران بوویە و هەکە رەوش وەسا بەردەوام بیت دێ ژیان ل ئیرانێ گەلەک زەحمەت بیت و بەرپرسێن ئیرانێ ژ هندێ دترسن کو جارەکا دی خوەنیشادان ل ئیرانێ دەستپێ بکەن.
ئەو یەک د دەمەکێ دایە کو دوهی سەرۆک کۆمارێ ئیرانێ ژی راگەهاند کو دوژمنێن ئیرانێ شەڕەکێ ئابووری ل دژی خەلکێ ئیرانێ دەستپێکرینە و دڤێت خەلک هاریکاریا دەولەتێ بکەن.
