ئاکـپارتیێ دڤێت پەکـەکـە ب تەمـامی دەست ژ چەکـی بەردەت
رۆژنامەیەکا تورکیا دیار دکەت، ئاکپارتیێ دڤێت پەکەکە ب تەمامی دەست ژ چەکی بەردەت و ل هەمبەر دا دێ ئاسانکاریان بۆ ئۆجەلانی کەن و تورکیا بەرهەڤ نینە بەری چەکدانانا پەکەکێ چو یاسایان ژ پەرلەمانی دەرخینیت.
رۆژنامەیا “تورکیا” د راپۆرتەکێ دا دیار دکەت، دانوستاندن د ناڤبەرا بەرپرسێن تورکیا و دەم پارتیێ دا هەنە و پشتی هەلوەستێ حەفتیا بۆری یێ باخچەلی نها دەست ب بزاڤەکا نوو بۆ بەردەوامیا قووناغا ئاشتێ دهێتە کرن، بەرپرسێن ئاکپارتیێ دیار کرینە دڤێت بەری هەر تشتەکێ هەموو چەکدارێن پەکەکێ چەکێن خوە رادەست بکەن، ئانکۆ دڤێت پەکەکە ب تەمامی دەست ژ چەکی بەردەت و ل هەمبەر دا ئەو بەرهەڤن ئاسانکاریان بۆ ئۆجەلانی بکەن دا بشێت ب رەنگەکێ راستەوخوە پەیوەندیان ل گەل قەندیلی دروست بکەت و هەروەسا رێ ب رۆژنامەڤان و کەسێن ئەکادیمی ژی بهێتە دان دا کو بشێن سەرەدانا ئۆجەلانی بکەن.
بەرپرسێن ئاکپارتیێ ئەو یەک ژی دیار کرینە، هەکە هەموو ئەندامێن پەکەکێ دەست ژ چەکی بەردەن وی دەمی دێ رەوشا ئۆجەلانی ژی ل زیندانێ باشتر کەن، ئانکۆ دێ ئیمکانێن وی زێدەتر لێ هێن، لێ دڤێت بەری هەر تشتەکێ چەک د دەستێ پەکەکێ دا نەمینن، چونکی زانیاریێن هەوالگری یێن تورکیا ڤێ راستیێ نیشا ددەن کو نها گەلەک چەک د عومبارێن پەکەکێ دا هەنە و هەتا ئەو چەک د دەستێ پەکەکێ دا بن تورکیا نەشێت چ پێنگاڤەکێ بهاڤێژیت.
هەمان رۆژنامێ ئەو یەک ژی دیار کریە، هەکە پەکەکە ب تەمامی دەست ژ چەکی بەردەت وی دەمی دێ ل پەرلەمانێ تورکیا یاسایێن نوو ژی هێنە دەرخستن و دبیت وی دەمی دەلیڤە بۆ خەباتا سیاسی بۆ ئەندامێن پەکەکێ ژی هەبیت، ب تایبەتی ژی ئەو ئەندامێن پەکەکێ یێن کو دشێن د چارچۆڤەیێ یاسایێن نوو دا ڤەگەرنە ڤە تورکیا، چونکی هەتا بابەتێ چەکی ب تەمامی نەهێتە چارەسەرکرن تورکیا نەشێت چو یاسایان دەرخینیت و دڤێت دەم پارتی ژی ب رۆلێ خوە رابیت و گرنگە بابەتێ نەمانا چەکی د دەستێ پەکەکێ دا د زووترین دەم دا بهێتە ئێکلاکرن.
ئەو یەک د دەمەکێ دایە کو بەری نها موراد قەرەیلان فەرماندارێ هێزێن پەکەکێ دیار کربوو، قووناغا ئاشتیێ ژ ئالیێ تورکیا ڤە ب تەمامی هاتیە راگرتن و هەکە تورکیا ب کریاری هندەک تشتان نەکەت دێ جارەکا دی ئالۆز روو دەن و ل هەمبەر دا بەری سێ رۆژان رەجەب تەیب ئەردۆغانێ سەرۆک کۆمارێ تورکیا ژی دیار کر، قووناغا تورکیا بێ تیرۆر قووناغەکا گەلەک گرنگە و ئەو یەک د بەرژەوەندیا هەموو تورکیا دایە و هەکە چو ئالۆز دروست نەبن دێ تورکیا بیتە وەلاتەک گەلەک بهێز و بێگومان تورکیا وی دەمی دشێت هەموو پرسێن هەی ژی چارەسەر بکەت.
