جوتیار عەلی: ب گەنجێن باژێڕێ خوە گەشبینین سەركەڤتنێ بینین
چاڤەڕێ یە ئەڤرۆ ل دەمژمێر شەشێ ئێڤاری تیما باسكێت بۆلا یانەیا زاخۆ یارییا خوە یا پێنجێ و دووماهیێ ژ قووناغا ئێكێ یا چارچووڤەیێ كۆما ئێكێ ژ هەڤڕكیێن خولا نایابا ئیراقێ بەرانبەر یانەیا غاز ئەلشیمال ل كەركووكێ بكەت و چاڤ ل سەركەڤتنێ یە ژبۆ ب هێزكرنا هیڤیێت خوە بۆ دەربازبوون بەر ب قووناغا پلەی ئۆف.
باسكێتا زاخۆ سەركەڤتن دڤێت
تیما یانەیا زاخۆ دێ بەرانبەر یانەیا غاز ئەلشیمال یاریێ كەت و چاڤ ل سەركەڤتنا چارێ یە بەری ب دووماهی هاتنا قووناغا ئێكێ ژبۆ پشتراستكرن و هێزكرنا هەلوەستێ خوە یێ دەربازبوون بۆ قووناغا چارگۆشەیا زێرین پشتی سەركەڤتن ل سەر سایبس یا هەولێر( 66-)53 خالان، دگەل نەفتا باكۆر(76-60 )خالان و عومال نەینەوا (63- 42) خالان، ژ لایەكێ دووڤە دگەل قارەمانا وەرزێ بۆری دیفا ئەلجەوی ب جووداهییا دەهـ خالان تووشی خوسارەتیێ بوو ب(48-58) خالان.
ل دۆر تیما زاخۆ و هیڤیێن وێ جەگەر عەلی سەرپەرشتێ تیمێ دیاركر تیما وان ب گەنجێن زاخۆ دهۆكێ پشكداربووینە و هەتا نوكە ئاستەكێ گەلەك باش نیشان داینە و گۆت: پێنەڤێت ئارمانجا مە نە بتنێ پشكداربین بەلكو پلێتەكا دەربازبوونێ بۆ چارگۆشەیا زێرین وەربگرین و هەڤڕكییا ناسناڤی بكەین سەرباری ئەركێ مە ب سانەهی نابیت، ئاستێ هونەری یێ قارەمانیێ گەلەك بهێزە و هەموو یانە هەڤڕكییەكا دژوار دكەن، یارییا ئەڤرۆ گەلەك گرنگە ژبەركو سەركەڤتن و كۆمڤەكرنا خالان دێ بۆ قووناغا دویێ یا خولێ بیتە بەلانسەكێ باشتر كو هیڤیێن مە بۆ دەربازبوونێ گەشتر بكەن،
بۆ زانین د وەرزێ ئەڤ سالە دا فدراسیۆنا باسكێت بۆلا ئیراقێ شێوازێ هەڤڕكیێ ل سەر ناسناڤێَ گوهۆڕتییە، ئەوا12 یانە پشكدارن و هاتینە بەلاڤكرن ل سەر دو كۆمان، كۆما ئێكێ پێكهاتیە ژ، زاخۆ، نەفت ئەلشیمال، سایبس، دیفاع ئەلجەوی، عومال نەینەوا و غاز ئەلشیمال، یاریێن وێ ل كەركووكێ دهێنە كرن، كۆما دویێ پێكهاتینە ژ دیجلە ئەلجامیعە، نەفت میسان، كارەبا، حللە، ئەلیەقزە و حەشد ئەلشەعبی، یاریێن وێ ل پایتەختێ ئیراقێ بەغدا دهێنە كرن، ل دووڤ سیستەمێ قارەمانیێ یاریێن قووناغا دویێ دێ ل 21ێ هەتا 25ێ ڤێ مەهێ هێنە كرن ئەوا چار یانە ژ هەر كۆمەكێ دێ دەربازبنە قووناغا هەشتێ پلەی ئۆف دێ ل 29 و 30ێ ڤێ مەهێ هێنە كرن.
