بەیاننامەیا فەرمی یا کارگێڕیا یانهیا دهۆک
دەستەیا کارگێڕیا یانهیا دهۆک دلگرانییا خۆ بۆ وان ڕوودانێن نەخۆش دەردبڕیت یێن کو دوهی د یاریا تیما مە و یانا مووسڵ دا پهیدابووین، ئەڤ ڕوودانە ئەنجامێ بڕیارێن نەدادپەروەرانه یێن دادڤانێ یاریێ بوون کو بوونە ئەگەر یاری بەرەف ئاراستەکێ دی بچیت و دلنهخۆشیێ و دلگرانیێ د ناڤ یاریگەهێ دا دروست بکەن، د هەمان دەم دا، کارگێڕیا یانهیێ تهكهزیێ دکەت کو جەماوەر و کارگێڕیا یانهیا مووسڵ یا خۆشتڤی چ پەیوەندی ب ڤان روودانان ڤە نەبووینە و ژبەر وێ پهیوەندییا برایانە و مێژوویی یا بهێز یا کو هەردو یانهیان و هەردو باژێران پێکڤە گرێددەت ئەم هەر براینە .
پەیاما وەرزشێ هەر دێ پەیاما حەژێکرن، نێزیکبوون، پێکڤەژیان و ڕێزگرتنا ل هەڤدو مێنیت، و ئەڤە دەمهكێ درێژە یانهیا دهۆک و د ڤی وەرزی ژی دا کار لسەر دکەت، ههر ژ دەمێ مە پێشوازی ل یانهیا مووسڵ ل یاریگەها خۆ کری د هەلکەفتێن جودا جودا یێن وەرزشی دا، جەماوەرێ دهۆکێ ههمی دهمان نموونەیا ڕەوشتێ بلندێ وەرزشی بوویە و پشتەڤان و ڕێز ل تیما مێڤان بوویە، ب هەمان شێوە کارگێڕیا یانهیا دهۆکێ د درێژاهیا وەرزی دا هەماهنگیەکا تمام دگەل کارگێڕیا یانهیا مووسڵ یا برا دا هەبوویە و ئەڤ پهیوەندیا برایانە دێ ل پاشەڕۆژێ ژی یا بەردەوام بیت.
کارگێڕیا یانێ تەکەزێ دکەت کو وان هەمی ڕێکارێن پێدڤی دژی هەر کەسەکێ بوویە ئەگەرێ ڤان ڕوودانان یان بێڕێزی کری گریته بهر د هەمان دەم دا، هیڤیدارین ژ فدراسیۆنا فۆتبۆلا ئیراقی کو ڕێکارێن یاسایی یێن توند دژی هەمی کەمترخەمێن ڤان ڕوودانان وەربگریت، د هەر پۆست و بەرپرسیاریەتیەکێ دا بن، پێخەمەت پاراستنا بوهایێ پیروزیێن خولێ و پاراستنا پەیاما پیرۆزا وەرزشێ.
هەروەسا ئەم دوپاتدكهین دکەین کو ئێک یاری یان ئەنجامێ یارییهكێ چ جاران نهشێت کارتێکرنێ ل سەر پهیوەندیێن مێژوویی و موكوم یێن د ناڤبەرا هەردو باژێران دا بکەت. ئەڤ براینیە گەلەک مەزنتر و کوورترن ژ هەر كاودانهكێ وەرزشی یێا ژنشکەکێ ڤە. دەرگەهێن یانهیا دهۆکێ دێ ههمی دهما یێن ڤەکری بن ل هەمبەر برایێن مه یێن مووسڵ، هەر وەکۆ چەوا د درێژاهیا ڤی وەرزی دا یێن ڤەکری بوون و د پاشەڕۆژێ دا ژی دێ هەر د ڤەکری بن.
ل دووماهیێ، دەستەیا کارگێڕیا یانهیا دهۆک ڕەتکرنا خۆ یا تەمام بۆ هەر دیمەنەکێ دەمارگیری ڕادگەهینیت، داخوازیێ ژ هەمی لایەنان دکەت کو ب گیانێ بەرپرسیاریەتیێ ڤە بزاڤان بکەن و پێکڤە کار بکەن پێخەمەت پاراستنا ئێکگرتنا جەماوەرێ یانهیێن مه و جێگیرکرنا واتا ڕاستەقینە یا وەرزشی.
