کرێ یا هۆلێن وەرزشی ل دهۆكێ گەلەگ گران بوویە
سندس سالح سلێڤانەیی:
پتریا ئەو كەسێن دچنە هۆلێن وەرزشی (لەشجوانی و مەلەڤانگەهان) گازندەیا ژ وێ چەندێ دكەن كو ل ڤێ دووماهیێ خودانێن وان هۆلان بهایێن خۆ گەلەك گرانكرینە و ڤێ چەندێ كاریگەری ل سەر وان هەبوویە و رێڤەبەریا چاڤدێریا بازرگانی ژی دبێژیت: گازندە گەهشتیە مە و لژنەیەك هاتیە پێكئینان د ڤێ حەفتیێ دا دێ دووڤچوونا بابەتی كەن و بها هێنە رێكخستن.
عەبدوللا سەلمان، گەنجەكە بۆ دەمێ چەند سالانە دچیتە هۆلێن لەشجوانیێ دبێژیت: ل دەستپێكێ دەمێ ئەز دهاتمە ڤێ هۆلێ بها دگونجاین بووین و هەیڤانە پارەیەكێ گونجای ژ مە دهاتە وەرگرتن، لێ ل ڤێ دووماهیێ بێی هەبوونا بهانەیەكێ وان ژی بهایێن خۆ گرانكریە و ڤێ چەندێ كارتێكرن ل سەرمە كریە، ب تایبەت وەكو گەنجێن بێ مووچە و بێكار، لەورا داخوازا من ئەوە بها وەكو بەرێ بزڤڕنەڤە.
زانا بەشیر، گەنجەكێ دی یە، ئەو ژی دچیتە هۆلێن وەرزشی، دبێژیت: گرانگرنا بهایان یا بێ ڕامانە، ب تایبەت دڤی دەمی دا، چنكو رەوشا درایی یا پتریا خەلكێ مە نەیا باشە و پشتی بها گران بووین ئەز دبینم وەكو بەرێ گەنج ناهێنە هۆلێ و یێن دوور كەفتین.
دەیكا ئاڤانی، ژنەكا (30) سالیە دبێژیت: ل دەستپێكێ دەمێ ئەم دهاتینە ڤان هۆلان هەیڤانە (30) هەتا (40) هزار دیناران مە ددان و ل هندەك جهان ژی ب (25) هزران بوو، لێ لڤێ دووماهیێ دو جاران هند گران بوویە.
نەشوان تەمەر، رێڤەبەرێ چاڤدێریا بازرگانی ل دهۆكێ، ل دۆر گازندەیا وی خەلكی دبێژیت: ئەو گازندە گەهشتیە مە و لژنەك بۆ دووفچوونا بابەتی هاتیە پێكئینان و د ڤێ حەفتیێ دا دێ سەرەدانا وان هۆلان كەن و ژ نێزیك زانن كا بهایێن هەر هۆلەكێ چەندن، ئانكو چەند پارە بۆ هەیڤەكێ ژخەلكی دهێنە وەرگرتن، پاشان دێ كۆمبوونەكێ كەین و بهایەكێ گۆنجای و رێكخستی بۆ هەموویان هێتە دانان.
