پارە و سیاسەتێ كورد و درجال دۆڕاندن
ئیحسان حەسەن
رەنگە پرسیارا ژ هەموویان گرنكتر دناڤا ناڤەندێن وەرزشی ب تایبەت یێن فوتبۆلێ دڤان دو رۆژێن بوریدا ئەوبیت، كا بۆچی چ بتنێ ئێك بەربژارێ هەرێما كوردستانێ دەركەڤت، یان خوەڤەكێشان ژ پۆستێن كو پێدڤی بوو هەڤركی لسەر كربان وەكو نوونەرێن هەرێمەكا فێدارلی یێن كو پێشوەخت رێككەڤتن لسەر هاتیە كرن، یا ژمن وەرە نەدەركەڤتن یان خوەڤەكێشانا بەربژێن كوردستانێ یا ئێكێ ژ دەرئەنجامێ راستەوخۆ یێ ژینگەها وەرزشی یا ئیراقێ بوویە، یێن كو نە لسەر بنەمایێن دەستكەڤتێن وەرزشی و خزمەتێ دهێنە برێڤەبرن، بەلكو لسەر سێ گۆشەیا مایتیكرنێن سیاسی و كرینا دەنگان ب پارەی و رێكەڤتنێن ل ژورێن تاری ڤە دهێنە كرن، یا دویێ هەرێما كوردستانێ وەكو پێكهاتییێ كوردی وەكو ئێك دەنگ پشكدار نەبوو دناڤا لیستەیا دەستەكا گشتی دا، هندەك یانە و كەسایەتی بۆ بەرژوەندیێن خوە یێن كەسوكی و حزبی چوونە دناڤا هەڤپەیمانیێن كوتلا هەڤرك دا، ژبیر نەكەین كو زۆربەی یانەیان نها گرێدای وەزارەتان نە وەكو یێن نەفتێ و نافخو و بەرەڤانییێ و ڤەگوهاستنێ دشێن پشتەڤانییێ ل هەر بەربژرەكێ بكەن، ڤێ چەندێ هێزا كوردان لاوازكر و نەهێلا وەكو هێزەكا ئێكگرتی مەرجێن خوە لسەر لایەنێ عەرەبی ب بسەپینیت، هەرچەندە من د گۆتارا خوەدا هەر لسەر ڤی بابەتی دڤی ستوونی دا من دیاركربوو كو بەری هەلبژارتنان پێدڤی یە هەرێما كوردستانێ برێكا رێڤەبەریا گشتی یا وەرزشی و لژنەیا ئۆلمپی و فدراسیۆنا فوتبۆلا كوردستانێ بەربژێرێن خوە بەری بچنە دناڤا بەریكانەیێ دا لسەر مێزەكێ دەستنیشانبكەن، كار لسەر دەركەڤتنا وان دگەل كوتلا مەزن بكەن، بزاڤێ بكەن ئێك ژ پوستێن سیادی و دو تا سێ كەسان بكەنە ئەندام دفیدراسیونا ئیراقێ دا و ئەڤە ژی نەهاتە كرن، یا سێیێ دۆراندنا عەدنان دەرجالی د بەریكانەیا سەرۆكاتییێ دا و ئەو خیانەتا لێ هاتیە كرن، ژلایێ وان لایەنان یێن كوسۆز پێ داین، سەرباری ئەو دەستكەڤتێن و ئەو كارێ دماوەیێ سەرۆكاتییا خوەدا بۆ ئیراقێ كری، گەهاندنا هەلبژارتیێ ئیراقێ بۆ مۆندیالا 2026ێ، دیتنا وێ ئینقلابا د دەنگدانێ دا هاتیە كرن، وەكر كو ئەندامێن كورد یێن كوتلا عەدنان درجالی كو ب ئاشكرایی پشتەڤانییا خوە بۆ دیاركرین، خوەڤەكێشن ب نەجاری وەكو پێنگاڤەك هەر چ نەبیت پێگەهێ خوە یێ وەرزشی پارێزن، یا من دڤێت بێژم نەدەركەڤتن یان خوەڤەكێشانا بەربژێرێن كورد نە ژ ئەگەرێ كێم شارەزاهییا وان بوو، بەلكو ژ ئەگەرێ ئیمبراتوریەتا دارایی و هەڤپەیمانیێن تۆند یێن سیاسی و بەرژوەندیان بوو، زێدەباری نە ئێك دەنگییا مە بوو یێن كو ئەم وەكو كورد و دەرجال لسەر ئێك تەختێ شەترەنجێ دۆراندین، ئەڤ چەندە ژی چەندێ راستیەكا تەحل و نەخۆش بۆ مەدیاردكەت كو ل ئیراقێ چ جاران دەستكەڤت و سەركەڤتنێن دمەیدانێن وەرزشی بەردەوامییا چ كەسان دگۆپیتكا دەستهەلاتا وەرزشی دا مسوگەر ناكەن، ئەگەر ئەڤ كەسە پشتگەرم نەبیت ب رێكەڤتن و هەڤپەیمانیێن بهێز یێن سیاسی و دارایی، هەر ئەڤە یە كارەساتا ژهەموویان مەزنتر.
