ههڤالێ وهفادار
د. ئهمجهد عوبید
گەلەک مەندەهۆش و حەیری ما، دەمێ هەڤژینێ خۆ و نێزیکترین هەڤالا خۆ، ب ڕووتی ل سەر تەختێ خۆ یێ نڤستنێ دیتین! ئەوا شۆک و مەندەهۆشیا وێ گرانتر لێکری، هەڤالا وێ، نە ژ وێ جوانتر بوو، نە ژ وێ نازکتر بوو، نە ژ وێ سەرەنجڕاکێشتر بوو، یا ژ هەمیان نەخۆشتر، ژیێ وێ ژی مەزنتر بوو.
داکو دەردێ دلێ خۆ بۆ بێژیت، ب لەزاتیا برویسیێ بەرەف مالا هەڤالێ وی یێ ژ هەمیان نێزیکتر چوو، نە بتنێ هەڤالێ وی بوو بەڵکو هەڤالێ وێ ژی بوو، ئانکو هەردوو خێزان هەڤال بوون.
میلێن دەمژمێرێ ئاماژە ددا کێمەک ژ نیڤشەڤێ وێڤەتر، دەمێ دەرگەهێ شقا وی ب توندی هاتیە قوتان. گەلەک ب هێمنی و پشتی فڕەکا مەزن ل ویسکیێ خۆ یێ شیڤازی دای و عەورەکێ دویکێلا جگارا خۆ یا مارلبۆرۆ ژ ناڤ لێڤێن خۆ بەردای.. گۆتێ:
– تە بتنێ دو ڕێک هەنە بۆ چارەسەریا ڤێ ئاریشێ و داکو دلێ تە ئارام ببیت و یا سیێ نینە؛ یان دێ لێبۆری و بەردەوامیێ دەیە ژیانا خۆ دگەل وی.. و ژبیرنەکە ئەو هەڤژینێ تەیه و گەلەک حەز ژ تە دکەت و مرۆڤەکێ باشە، و باش بزانە پتریا زەلامان، ئەگەر هەمی نەبن، ڤێ شاشیێ دکەن و پاشی پەشێمان دبن و دزڤرنە د باوەشا هەڤژینێن خۆ داڤە.
بەری یا دووێ بێژیت، گۆتێ:
– پا کا هەڤژینا تە؟
– ئەڤرۆ ئێڤاری یا چوویە مالا بابێ خۆ. یا دووێ: تو لێ نابۆری و دێ پەنایێ بەیه تۆلڤەکرنێ و خیانەتێ لێ کەی.. دگەل من!
