هەلوەشاندنا کۆپا ئیراقێ د بەرژوەندییا کێ دا یه؟
قەیس وەیس
ل دەمەکی دا کو قارەمانیا کۆپا ئیراقێ ب خەون و هیڤییا چەندین یانەیێن خولا ستێرێن ئیراقێ دهاتە نیاسین ئەوێن پشکدار د ململانێ یا ناسناڤی دا نەکری، د هەمان دەم دا ب دەلیڤەیەکا زێڕین بۆ یانەیێن خولا نایاب دهاتە هژمارتن بۆ تۆمارکرنا سەرکەفتنێن نەچاڤەڕێکری، ژ نشکەکێ ڤە فیدراسیۆنا فوتبۆلا ئیراقێ یا نوو ب بڕیارەکا سەیر هەموویان شۆک دکەت و ڕاگرتنا ڤێ قارەمانیێ بۆ ڤی وەرزی ڕاگەهاند.
ئەڤ بڕیارە ب مەرەما پێدانا دەلیڤەیەکا پتر بوو بەرهەڤیێن یاریزانێن هەڵبژارتیێ نیشتیمانی بۆ مۆندیالا جیهانی ٢٠٢٦ێ، لێ ژلایەکێ دیڤە بوو ئەگەرێ دروستبوونا کارڤەدانێن مەزن و جودا د ناڤا ڕاگەهاندنا وەرزشی یا ئیراقێ دا، پشکەک ژ لایەنگران دبینن کو ئەڤە بڕیارە دابونەریتەکێ سالانە یێ گرنگە و ب بڕیارەکا لاواز پۆلێن دکەن، د بەرامبەر دا هندەکێن دی ب پێنگاڤەکا ئەرینی و پێدڤی دبینن.
ڕوانگەکا ڕەخنەیی: بۆچی ئەڤ بڕیارە د جهێ خۆ دا یە؟
ژ دیتنا من و وەکو چاڤدێرەکێ بارەدوخێ وەرزشی، ئەڤ بڕیارا فیدراسیۆنێ د جهێ خۆ دا بوو و چەندین ئەگەرێن لۆژیکی پشتەڤانیێ لێ دکەن:
کێمکرنا گڤاشتنا ل سەر یاریزانان: خشتێ یاریان ل سەر یەک د خولێ دا بارگرانیەکا مەزن ل سەر یانەیان دروست کربوو، دیسان ڕاگرتنا خولێ بۆ چەندین جاران ژبەر پێشڤەچوونا هەلبژارتیێ ئیراقێ و گەهشتنا وی بۆ مۆندیالێ، پێدڤی ب چەسپیانا خشتەیی هەبوو، لەورا بڕیارەکە حەتا ڕادەیەکێ سەرکەفتییە بۆ قەرەبووکرنا وی دەمی.
پێدانا دەلیڤەیا بێهنڤەدانێ: پێدڤییە خول زوو ب دووماهی بهێت دا کو یاریزان بشێن ژ لایێ جەستەیی و دەروونی ڤە خۆ نوو بکەنەڤە و تووشی هنگاڤتنێن گران نەبن.
پشتەڤانیکرنا هەڵبژارتیێ ئۆلمپی: ئەڤ بڕیارە ڕێ خۆش دکەت کو یاریزانێن ئۆلمپی د دەمێ خۆ دا بگەهنە کەمپێن ڕاهێنانێ بەبێ چاڤدیری و ڕێگری ژ لایێ یانەیێن وان ڤە.
دەلیڤە بۆ ڕێکئێخستنا گرێبەستان: ب بڕێڤەچوونا زوو یا کۆتایی هاتنا وەرزێ، یانەیێن خولا ستێرێن ئیراقێ دێ شێن زووتر دەست ب کارێن خۆ یێن کارگێڕی بکەن، چ ژ لایێ ئینانا یاریزانێن نوو یان نووکرنا و دووماهی ئینانا گرێبەستان، ئەڤ چەندە ژی دەلیڤەیەکێ ددەتە یاریزانان دا کو ب ئازادی ل یانەیەکا دی بگەڕێن.
سیستەمێ نوو یێ کۆپا سۆپەری: ژبەرکو بڕیار هاتیە دان کۆپا سۆپەرا ئیراقێ د ناڤبەرا چوار یانەیێن پێشیێ د خولێ دا بهێتە ئەنجامدان، ئەگەر کۆپا ئیراقێ ژی هاتبا کرن، چ دەم نە دمان بۆ یانەیان دا کو خۆ بۆ وەرزێ نوو بەرهەڤبکەت، لدووماهیێ دشێین بێژین سەرەڕای ڕەخنەیان، ئەڤ پێنگاڤە پتر خزمەت و بەرژەوەندیا گشتی یا فوتبۆلا ئیراقێ و پاشەڕۆژا هەلبژارتیێ نیشتیمانی دکەت.