پێشبینی دكەین 600 هزار تەنێن گەنمی بهێنە بەرهەمئینان
سندس سالح سلێڤانەی:
ل چەند ڕۆژێن بهێن ب شێوەیەكێ فەرمی ل پارێزگەها دهۆكێ دەست ب دروونا گەنمی دێ هێتە كرن، ڕێڤەبەرییا چاندنێ ژی ل پارێزگەهێ دیار دكەت، كوالیتییا گەنمێ ئەڤ سالە گەلەك یا باشە.
ئەحمەد جەمیل، ڕێڤەبەرێ گشتی یێ چاندنێ ل دهۆكێ ئاشكرا كر، ئەوان ل دەڤەرێن هەڤسنۆر ل گەل پارێزگەها نەینەوا دەست ب دروونا گەنمی كریە، هەتا پێنج ڕۆژێن دی، ل سنۆرێ پارێزگەها دهۆكێ ژی دەست ب دروونا گەنمی دێ هێتە كرن و گۆت: «ئەڤ سالە 903 هزار دۆنەمێن ئەردی گەنم لێ هاتییە چاندن، كوالیتییا وی ژی دێ گەلەك یا باش بیت، ئەم پێشبینی دكەین 500 هەتا 600 هزار تەنان بهێنە بەرهەمئینان».
سەبارەت وەرگرتنا ڕێژەیا گەنمی ژ لایێ ئیراقێ ڤە ناڤهاتی گۆت: «هەتا نوكە بۆ مە نەهاتییە دیاركرن، كا چەند تەنێن گەنمی دێ هێنە وەرگرتن و رادەستی بەغدا هێتە كرن».
