بەغدا پێنگاڤێن كریاری بۆ تێكهەلكرنا هێزێن «سەرایا سەلام» د ناڤ دەزگەهێن ئەمنی دا دهاڤێژیت
سەرۆك وەزیرێن ئیراقێ، ل گەل شاندەكێ بلند یێ باسكا نیشتمانی یا شێعی رێككەفت ل سەر پێكئینانا لیژنەیەكا هەڤپشك، ب مەرەما بجهئینانا دەستپێشخەرییا موقتەدا سەدری بۆ تێكهەلكرنا هێزێن «سەرایا سەلام» د ناڤ دەزگەهێن ئەمنی یێن فەرمی دا و رادەستكرنا چەكێن وان بۆ حوكمەتێ.
عەلی فالح ئەلزەیدی، سەرۆك وەزیرێن ئیراقێ و فەرماندەیێ گشتیێ هێزێن چەكدار ل بەغدا پێشوازی ل شاندەكێ بلند یێ باسكا نیشتمانی یا شێعی كر، كو نوونەرایەتییا موقتەدا سەدری دكر. كۆمبوون ب بەرهەڤبوونا جێگرێ فەرماندەیێ ئۆپەراسیۆنێن هەڤپشك بڕێڤەچوو.
ل گۆڕەی بەیاننامەیەكا نڤێسینگەها راگەهاندنا سەرۆك وەزیران، تەوەرێ سەرەكیێ كۆمبوونێ تەرخانكری بوو بۆ دانانا میكانیزمەكا گونجای و زانستی بۆ بجهئینانا دەستپێشخەرییا موقتەدا سەدری، یا كو د تێكهەلكرنا چەكدارێن «سەرایا سەلام» د ناڤ رێزێن هێزێن ئەمنی یێن ئیراقێ دا و رادەستكرنا هەموو چەكێن وان بۆ دەزگەهێن فەرمی یێن دەولەتێ دا خۆ دبینیت.
ژ بۆ بلەزكرن و رێكخستنا ڤێ پرۆسێسێ، د ناڤ كۆمبوونێ دا بڕیار هاتە دان ل سەر پێكئینانا لیژنەیەكا تایبەتمەند، ئەركێ وێ چاڤدێریكرنا قۆناغێن ڤەگوهاستن و ئێكگرتنا چەكداران و وەرگرتنا چەكێن وان بیت، ب شێوەیەكێ كو ل گەل یاسایێن بەركار و سیستەمێ سەربازی یێ ئیراقێ بگونجیت.
ژئالیێ خۆ ڤە، عەلی ئەلزەیدی سوپاسییا خۆ و یا حوكمەتا ئیراقێ بۆ ڤێ پێنگاڤا رێبەرێ باسكا نیشتمانی یا شێعی دەربری و دوپاتی ل سەر وێ چەندێ كر، كو ئەڤ جۆرە بڕیارە هەلوەستێن نیشتمانی یێن بلندن و د خزمەتا چەسپاندنا سەروەرییا یاسایێ و بهێزكرنا دەزگەهێن دەولەتێ و پاراستنا ئاسایشا نەتەوەییا ئیراقێ دانە.
ئەڤ پێشهاتە ب ئێك ژ پێنگاڤێن ستراتیژی یێن گرنگ دهێتە هەژمارتن ژ بۆ كۆنترۆلكرنا چەكی ل ژێر دەستێ دەولەتێ و كاراكرنا پترییا هێزێن چەكدارێن فەرمی ل وەلاتی.
ئەڤە د دەمەكێ دایە، رۆژا چوارشەمبی، 27ـێ گولانا 2026، موقتەدا سەدری د پەیامەكێ دا راگەهاندبوو، ژ بەر بەرژەوەندییا گشتی و بۆ دووركەتن ژ وان مەترسیێن ل سەر نیشتمانی، دڤێت «سەرایا سەلام» ب ئێكجاری ژ باسكا نیشتمانی یا شێعی جودا ببن.
موقتەدا سەدری ئاماژە ب وێ دابوو، كو ئەڤ هێزە ژ ڤێ گاڤێ و پێڤە دێ ب تەمامی بنە پشكەك ژ دەولەتێ و دێ چنە ژێر فەرمانا بەرپرسێ ئێكێ یێ سەربازی ل وەلاتی.
پێشتر، سەباح نوعمان، پەیڤدارێ عەلی ئەلزەیدی، فەرماندەیێ گشتی یێ هێزێن چەكدارێن ئیراقی، هندەك پێزانین ل دۆر لیژنەیا ڤەكۆلینێ ل سەر هێرشێن میلیشیایان بۆ سەر وەلاتێن كەنداڤی ئاشكرا كربوون وگۆتبوو: «دڤێت بتنێ دەولەت خودانا هێز و بڕیارێ بیت، پرۆسەیا ژچەككرنێ ژی نە درووشمەكێ سیاسییە، بەلكو ستراتیژە».
سەباح نوعمان د داخۆیانییەكێ دا بۆ ئاژانسا دەنگوباسێن ئیراقی ئاشكرا كربزز، ب فەرمانا عەلی ئەلزەیدی، سەرۆكێ وەزیران و فەرماندەیێ گشتی یێ هێزێن چەكدار، لیژنەیەك هاتییە پێكئینان و نها ل سەر شرۆڤەكرنا پێزانینان ل دۆر وان هێرشان كار دكەن یێن ل سەر ئیمارات و سعوودیێ هاتینە كرن.
نوعمانی دوپاتكر كو هەر دەمێ ڤەكۆلین ب دووماهی هاتن، ئەنجام دێ ب تەمامی هێنە راگەهاندن. هەروەسا گۆت: «ئاسایشا برایێن مە هێلا سوورە».
ل دۆر وێ چەندێ ژی كو دڤێت چەك بتنێ د دەستێ دەولەتێ دا بیت، سەباح نوعمانی گۆت: «ئەڤە نە درووشمەكێ سیاسییە، بەلكو ستراتیژە و دڤێت بتنێ دەولەت خودانا هێز و بڕیارێ بیت».
