شاها بەهەشتێن هەلاویستی
قەهرەمان عەبدوللا بەرواری
دەڤێن هەمیا د پڕن
تنێ پرتێن مرنێ ژێ د بارن
بەژنا تە یا نازك
تاكێن ڤیانەكا پیڤازی پێڤە د بن تلۆڤە و
ژ ناڤ دەستێن تە كانی یێن ئاڤێ دەر دبن
ژ ئەسمانێ گەشێ چاڤێن تە
پەرمیچكێن بەفرەكا هێمن د هێن خارێ و
بیابانێن داخگرتی یێن شكەستنێن من
ب كراسێ بویكا د نخێڤن
سەرێ تلێن من
حەز دكەن زەلالییا ئاڤێ هەمبێز بكەن
ژ داڤێن ڕۆناهیا دێمێ تە
پرچا شەڤەكا هێمن بڤەهوینن
بلا
كەزیكێن شەڤین
ماجی گەردەنا نالینێن حەسرەتا من بكەن
بلا
پێلێن دەریا دلینییێ
پەڕێن چاڤێن مە پڕ بكەن
بلا
هزار هزار نەورەسێن سپی بهێن
ژ داڤەدەزی یێن هلوەریانا مە
وەریسێن كەیفەكا بەردریای ڕابچینن
هەرێ میدیا..
هەی شاها بەهەشتێن هەلاویستی
هەناسەیێن من
بەلگێن چڤاتا خەملا بەژنا تە د خوازن
بلا ئەز و تو
هەر ببین یەك داڤ
یەك باغ
یەك ڤیان و یەك ژیان.
