دهۆك و زاخۆ وەرزێ شاشییان ب دووماهی هات
ئیحسان حەسەن
پشتی ب داوی هاتنا هەڤڕكیێن خولا ستێرێن ئیراقێ یا فوتبۆلێ، ڕەنگە پرسیارا ژ هەموویان گرنكتر دناڤا جەماوەرێ و حەژێكەرێن هەردو جەمسەرێن فوتبۆلێ یێن پارێزگەهێ دهۆك و زاخۆ ئەوبیت، كا بۆچی هەردو تیم نەشیان ئەوا پێدڤی بجهبینن، ددەمەكی دا چاڤەرێ لێ دهاتە كرن كو ببنە هەڤڕكێن بهێز لسەر ناسناڤێ خولێ، دیسان بدەستڤە ئینانا هەر چ نەبیت پلێتەكا پشكداریێ دقارەمانییەكا دەولەتی دا لسەر ئاستێ كێشوەرێ ئاسیا یان ژی كەنداڤی، بەلێ ئەڤە وەكو بوۆچوون ماینە پشتی وان ئەنجامێن لاواز و پاشكەڤتنا ئاستێ هەردو تیمان، ئەوێن ژ دەرئەنجامێ هژمارەكا شاشیێن تەكنیكی و كارگێری بڤێ رەوشا خراب دەركەڤتین، ئێك ژ هۆكارێن هەرە مەزن یێن بەرزەبوونا ناسنامەیا وان هۆكارێ گوهۆرینا راهێنەران بوو، ژبەركو گوهۆڕینا كادرێ تەكنیكی پتر ژ جارەكێ مەزنترین گۆرزە ل پێكهاتە و فەلسەفا گشتی یا تیمێ دكەڤیت، ژبەر كو هەر راهێنەرەك خودان شێواز و پلانەكا تایبەتە، یاریزان نەشێن دماوەیەكێ كورت دا خوە دگەل پلانێن جێواز بگونجینن، ئەڤ چەندە یا دیاربوو لسەر ئەنجامێن تیمێ، یا دیتر نەسەركەڤتنا هەردو یانەیان د بازارێ كرینا یاریزانان دا، ئانكو نەشیان گرێبەستێن باش دگەل وان یاریزانان گرێدەن یێن كو بشێن جوداهییێ پەیدابكەن، ب تایبەت دهێلا بەرگێریێ و هێرشبرنێ دا و ئەڤ بۆشاییە یا دیار و بەرچاڤ بوو بدرێژاهییا هەڤركیێن خولێ، ژبلی هندێ مەزنترین شاشیا وان ئەوبوو كارگێریێ رێ ب دەستبەردانێ ب هژمارەكا ستوونێن تیمێ یێن وەرزێ بوری دا، نەشیا وەكو پێدڤی پێكهۆرێن باشتر ل جهێ وان بینن، كو بشێن تیمێ رابگرن بەرەف رەوشەكا باشتر ددەمێ پێدڤی دا ببەن، ژلایەكێ دیڤە سزانیێن كارگێری و مادی یێن كو ژلایێ فیدراسیۆنا ئیراقێ ڤە وەكو یاریكرن بێ جەماوەر و ڤەگوهاستنا یاریان، كارتێكرنەكا دەرونی یا توند لسەر زاخا یاریزانان هەبوو بۆ ئەگەرێ هندێ كو چەندین خالان دناڤا یاریگەها خوەدا دیسان ژ دەرڤە دەست بدەن، بێ نەڤێت شاشیێن دادڤانان ژی ئەگەرەكێ دی بوو، داكو هەردو یانە بۆ وەرزێ بهێت باشتر و بهێزتر بهێنە دناڤا هەڤڕكیێن خولێ دا، پێدڤییە كارگیریێن هەردو یانەیان هەلسەنگاندنەكا تێرو تەسەل بۆ تیمێن خوە بكەن و مفای ژوانە و سەربۆرێن وەرزێ بوری بینن، هەر ژنها ستراتیژیەتەكا درێژخایەن بدانن، ئەوژی پشت بەستنێ لسەر ئینانا كادرەكێ راهێنانێ یێن شارەزا و خودان سەربۆر بۆ ماوەیەكێ درێژ، دگەل پاراستنا ستوونێن تیمێ، ژبلی هندێ دانانا لژنەیەكا خودان شیان بۆ گرێدانا گرێبەستان دگەل یاریزانان لدووڤ پێدڤیێن تیمێ ئەوژی ب ئینانا یاریزانێن سۆپەر كو هەر چ نەبیت دهەر هێلەكا تیمێ دا ئێك هەبیت، یا من دڤێت بێژم ئەگەر هەردو نوونەرێن پارێزگەها دهۆكێ ئەلهویێن چیا و كورێن خابووری بڤێن پشكداریەكا سەرفەراز ل وەرزێ بهێت دا بكەن، پێدڤییە پشت بەستنێ لسەر پلانەكا دەكمەن و زانستی بكەن، ژبلی هندێ دابینكرنا سەقامگیریەكا بەردەوام یا تەكنیكی، ژبەر كو دیرۆكا فوتبۆلێ سەلماندیە كو چ تیم ب دروشم و سۆزێن لسەر كاغەزێ و بریارێن بێ بنەما ب سەرناكەڤن، لەوما دڤێت ئەم چاڤەرێ بین.
