ئاش و وەرز و سترانەکا حەمکێ تۆڤی
خورشید توفیق باکۆزی
عیسێ مامۆ ..
کەڤر و بەر و بەر ئاشێن تە
گەهــ و پەراسویێن تەوەر و ڤللەیێن
کەپی بلندن …
بلندترن ژسەرێ چارچەلی و ئەلهۆی
ئاڤا خورتا بەرەف ژۆرە و
روبارەکە بەرەف بانیا ئاسۆیێ چووی
ناڤەگەڕیێت …
وەرزێ تە بۆ بەگان وەخف و پویڕەیە
بۆ پەژاران کەڤنە ژانە و
پاریەکێ هشکێ خەمانە و
هەموو رۆژێ دکێت و ڤەدکێت ..
عیسێ مامۆ …
کۆچکا میرێ تە ڤالایە
ل سەیرانا بەرێ سیلێ
ژئەڤرۆ وێڤە کلۆرە نابنە کادە
فراڤینا حەفک ستویرا
یان ( برج العرب) یاحەفت ستێرە
یان باشترین گزیرتەیا ئەورۆپایە ..
بەلێ مامۆ …
کۆچکا میرێ تە ڤالایە
ئەڤە ژمێژە سینەم یا ژ واری هاڤی یە و
ژ واری زیزە ..
بهارا حەمکێ پاییزە و
دەنگێ (حەمکی) ل کەلێ ناهێت ..
حەمک ئاواز و سترانان
ب بەژنا سینەم خانێ نابێت ..
بەلێ ئەز یێ ل وێ باوەرێ
دەنگ و ئاوازێن سازا وی
ل بورجێن کەلێ دێ دەنگڤەدەن
چرا گەشا سترانێن وی
دێ هەرمینیت نا ڤەمریێت
سینەم دێ هەرڤەگەریێت و
مەشکا ئەڤینەکا دی کێت ..
دێ گازی کەت
حەمک هەیلێ حەمک هەیلوو
دەم و ژدانەکا کویڤی یە و
چانتکێ خەونێن باپیرێ من
کەفتە بەر پێلێن ڕویباری و
چانتکێ خەونان ب ئاڤێ دا چوو
ب ئاڤێ دا چوو…
