هەماهەنگییا ئەمنی و هەواڵگیری ل گەل هەولێرێ یا گرنگە
قاسم ئەعرەجی، شیرەتكارێ ئاسایشا نیشتمانییا ئیراقێ، د دیدارەكێ دا ل گەل فارس عیسا، سەرۆكێ نوونەرایەتییا حوكمەتا هەرێما كوردستانێ ل بەغدایێ، دوپاتی ل سەر گرنگییا بەردەوامبوونا هەماهەنگییا ئەمنی و هەواڵگری د ناڤبەرا هەردوو ئالییان دا كر.
د ڤێ كۆمبوونێ دا، رەوشا دەڤەرێ و پێدڤییا ئێكگرتنێ ل هەمبەر ئاستەنگان هاتە گەنگەشەكرن. تەوەرەكێ سەرەكیێ دیدارێ ژی تایبەت بوو ب گرنگییا بزاڤێن هەڤپشك ژ بۆ پاراستنا سنۆران و لێكگۆهارتنا پێزانینێن هەواڵگری د ناڤبەرا هەولێرێ و بەغدایێ دا، وەك پایتەختێ فیدرال.
شیرەتكارێ ئاسایشا نیشتمانییا ئیراقێ د ڤێ دیدارێ دا ئاماژە ب وێ چەندێ كر، د ڤێ قۆناغێ دا پێدڤییا وان ب ئێك هەلوەستییا سیاسی هەیە ژ بۆ پشگیریكرنا بەرنامەیێ كابینەیا حوكمەتێ و بەردەوامییا پێشئێخستنا وەلاتی.
د هەمان دەم دا، د روونشتنێ دا دوپاتی ل وێ چەندێ هاتە كرن كو پێشئێخستنا پەیوەندییان دێ بیتە ئەگەرێ چەسپاندن و بهێزكرنا سیستەمێ دیموكراسی و پاراستنا دەستكەفتێن دەستووری، لەورا بەردەوامبوونا تێكگەیشتنێن د ناڤبەرا هەرێمێ و بەغدایێ دا، ب پێدڤییەكا گرنگ دهێتە دیتن.