سەرمایەیێ كەرتێ گەشتوگۆزارێ ل هەرێمێ گەهشتییە 7 ملیار دۆلاران
دلۆڤان ئاكرەیی:
سەرۆكێ دەستەیا وەبەرهێنانێ ل هەرێما كوردستانێ دیاركر، وان هەماهنگیەكا گەلەك باش دگەل دەستەیا گەشتوگوزارێ هەیە، و نەخشە و بەرهەمێن گەشتوگوزاری ل هەرێما كوردستانێ هاتینە بەرهەڤكرن و ل ڤێ مەهی، دێ دوو كۆڕبەند یان ئاهەنگ هێنە گێران، ئێك ل هەولێرێ و ئێك ل دهۆكێ بۆ پشتەڤانیكردنا كەرتی گەشتوگوزارێ ل هەرێمێ كو ئارمانجا سەرەكی یا وان ل سازكرنا كوربەند و ئاهەنگان بۆ نێزیككرنا دیتنا وەزارەتا باژێرڤانی و گەشتوگوزارێ دگەل دەستەیا گەشتوگوزارێ، دا كو پڕۆژێن پتر بهێنە ئەنجامدان و خەلكەكێ پتر ل هەرێمێ مفا ژێ وەربگرن.
د. مەحەمەد شوكری، سەرۆكێ دەستەیا وەبەرهێنانێ ل هەرێما كوردستانێ بۆ رۆژنامەیا ئەڤرۆ گۆت: پێدڤییە ٧٥٪ ژ كرێكارێن هەمی كەرتان یێن ناڤخۆیی بن، بەلێ د كەرتی گەشتوگوزارێ دا ئاریشەیا نەبوونا خەلكێ شارەزا ب شێوەیەكێ دەستبەجێ هەیە، لەوما ب هەماهەنگی دەستەیا وەبەرهێنانێ دگەل دەستەیا گەشتوگوزارێ، وەزارەتا باژێرڤانی، «جۆب لۆكاڵ» (Job Local)، و دەزگەهێ كوردستان فۆندەیشن، بزاڤ هاتینە كرن خەلك بهێتە بەرهەڤكرن دا كو ل ماوەیێ بهێت خەلكێ كوردستانێ ل ناڤ ڕێكخراو و سازیێن گەشتوگوزاری كار بكەن.
ئاشكراكر، قەبارێ وەبەرهێنانێ د نوكە دا سەرمایەیێ ڤی كەرتی ل هەرێما كوردستانێ نێزیكی 7 ملیار دۆلارێن ئەمریكی نە، كو هەڤبەركرن دگەل كەرتێن دی ڕێژەیەكا گەلەك بلندە و كەرتێ گەشتوگوزار د لێكا تێگەهشتنا لایەنێ پیشەسازی و ئاكنجیبونێ دا، وەك سێیەم كەرتێ گرنگ ل هەرێما كوردستانێ دهێتە هەژمارتن كو پترین سەرمایە تێدا هاتیە جێبەجێكرن.
د. مەحەمەد شۆكری، لدۆر مەرجێن پڕۆژێن بازرگانی گۆت: هەر وەبەرهێنەرەكێ داخوازا دروستكرنا پڕۆژەكێ بازرگانی بكەت، پێدڤییە پشكەكا گەشتوگوزاری تێدا هەبیت وەك (خارنگە، مۆتێل، هۆتێل، یان كافتێریایەكا گەشتوگوزاری) دا كو پشتەڤانیا ڤی كەرتی بهێتە كرن و ب بەردەوامی ژی دووپاتی ل سەر بلندكرنا كوالیتیێ دهێتە كرن.
