گەشتیارێن بیانی ب سەرەدانا جهێن گەشتیاری یێن دهۆكێ د دلخۆشن

سندس سالح سلێڤانەیی:

سالانە دگەل هاتنا وەرزێ زڤستانێ و بلندبوونا پلەیێن گەرماتیێ، هژمارەكا زۆرا گەشتیارێن عەرەب ژ ناڤەراست و ژێریا عیراقێ ب مەرەما دەم بۆراندنێ دهێنە پارێزگەها دهۆكێ و قەستا جهێن گەشیاری دكەن و پتریا وان دبێژن ئەو سەقایێ ل دهۆكێ هەی ل باژێرێن وان نینە و ئەو ژ بەر گەرما دژوار ڕەڤینە و گەشیارەكێ (75) سالی ژی دبێژیت: دهۆك وەكی بەهەشتا سەر عەردی یە و خودێ ڤێ بۆ خەلكێ وێ بهێلیت.

ئەبو ماهر، كو ناڤێ وی یێ دروست (حەسەن عەبادی) یە و خەلكێ بەغدایە دبێژیت: ژیێ من (75) سالن و د ژیانا خۆدا ئەز گەلەك حەز ژ گەشتكرنێ دكەم و چ جه نەماینە ئەز نەچوویمە، هەتا توركیا و ئیرانێ ژی، بەلێ دەمێ ئەز دهێمە دهۆكێ بۆ من ژ هەموو جهان خۆشترە، چونكو بەری هەموو تشتان خەلكێ وێ یێ جامێر و قەدرگرە و هەر جهەكێ ئەم دچینێ گەلەك رێزێ ل مە دگرن و دبێژن (هوون مێهڤانێن مەنە)، یا دویێ دیمەنێن وێ یێن جوان و سەقایێ سار گەلەك د دلڤەكرن.
یاسر حەمید، گەشتیارەكێ دی بوو، دبێژیت: ئەز خەلكێ باژێرێ (مووسل)م و بەردەوام دهێمە دهۆكێ، نە بەس دوەرزێ هاڤینێ دا، بەلكو د وەرزێن دی ژی دا، چونكو یا ئێكێ بۆ مە یا نێزیكە، هەروەسا من گەلەك دوست و برادەرێن كورد ل ڤێرە هەنە ئەم سەرەدانا مالێن وانژی دكەین.
عەباس موتەیری، گەشتیارەكێ دی یێ خەلكێ بەغدا یە، ئەو ژی دبێژیت: ئەز ب خێزانڤە ئێك ژ وان كەسانم یێن كو بەردەوام دهێنە هەرێما كوردستانێ، ب تایبەت ژی پارێزگەها دهۆكێ و ئەو رێزگرتن و مێڤانداریا خەلكێ دهۆكێ ل مە دگرن ل كێم جها هەیە.
دەیكا (زەهرا) یێ، گەشیارەكا دی یا خەلكا (مووسل) بوو، وێ ژی گۆت: دهۆك باژێرێ مە یێ دویێ یە، ژبەركو مە خزمانیا دگەل هەی و كچەكا من شوو ب كوردەكێ دهۆكێ كریە و ژبەر جامێری و باشیا هەموو ئەندامێن مالا زاڤایێ مە ئەڤ چەندە بوویە ئەگەر كو ئەم وان خەریب نەكریە و باوەرناكەم جارەكێ ژ دو حەفتیان بۆری بیت و ئەم نەهاتبینە دهۆكێ.

کۆمێنتا تە