گەردەنا خەونەکا هێمن بخەملینە
قەهرەمان عەبدللا بەرواری
گەردەنا تە
گۆڕەپانا خەونێن منە،
هیڤی ل ژێر کەپرێن وێ دا
مەخەل دبن…
چاڤێن کۆرەیێن شەڤێن ڕەش ناڤەشێرن
ئاگرێ ل چیایێ (گارە)ی بوویە ڕوانگەها هل
هەمی شەمال کرنە پالەیێن ڕۆنییا ژییەکێ نوی و
جەژنابوونا عشقەکا نوی دهێتەگێڕان..
دێ تو وەرە
بکە شالیل بەختێ من و
دا بخوینیت ئاوازێن ڤەوەریانا ڕۆندکێن بارانان
ل گولستانا چاڤەرێکرنێ
مە ژڤانە،
ل گەل مرنا داڤێن شەڤێ،
خۆ دویر بکەین
ژ فیغانێن خۆ یێن یاخی
ببین یەک جۆت
خۆ دویر بکەین،
ژ گێلەشۆکێن ڤی چاخی
ژێ بمینین ڕویت
دەستویری بیت،
دێ چاڤێن تە کەمە هێلین و لێ مەشم
نافڕم، نە
ب بێهنا گولا سەرخوەشم
دەستویری بیت
دێ دەستێن تە
کەمە تەخت و
کەمە وەلات و لێ نڤم
خەو شرینە
توی خەون ل گەل بچڤم
دلێ من
میرگەها ئۆمێدانە و
ئۆمێد دبن.
ئەوا چاڤێن (سەلما) جزیرێ
ژ (بورجا بەلەک) دبارن
ل سەر سینگێ وی (جزیری) دبن دوڕ و
تەیسۆک د بن
دلێ من
پاپۆرەکا بێ خودانە و
خودان دڤێن…
ل نیڤەکا دەریا عەشقا چاڤێن تەدا
مایە بەرزە…
ب گڕنژە، بکە کەنی
دلێ من،
ئەو گڕنژین
ئەو کەنیا تەڕ
(کاپتن) د ڤێن
تۆ بگوهۆڕە
کەڤلێ ستێرا ئەسمانێ خۆ
دا ئەز د ئاڤا زێرێ زەر ب هەلینم
تو ب هێرە
گەنمێ شێڤا ئەڤینا خۆ
دا دستارێن ئاشێ ژینەکا بەختەوەر ببینم
دێ وەرە دێ
با و باڕوڤەیا گیانێ من
ما ل بەندا دێمێ ڕۆژێ
خۆ بکەتەڤە ستڤانک و
ئەو گەردەنا قەدەرا من بخەملینیت
بخەملینیت.
