ئەدۆلف ئەپیا.. ئەو ئەندازیارێ دەپێ شانۆیێ ژ مرنێ ڕزگارکری
بینەر محەمەد
بۆ دەمێ چەندین سەدەیان، دەپێ شانۆیێ تنێ پاشبنەمایەکا کێشایی بوو ل سەر قوماشی، کو ئەکتەر ل پێشیا وێ دئاخفتن. لێ زەلامەک هات و دیت کو ئەڤ شێوازە یێ مری یە و چ خەیال تێدا نینە. ئەو ژی ئەندازیارج «ئەدۆلف ئەپیا» بوو، ئەو ئەندازیار و داهێنەرێ کو پێکهاتە و بنیاتنانا دەپێ شانۆیێ گوهۆڕی و کریە جیهانەکا سێ ڕەهەندی یا تژی ژ لڤین و بزاڤان.
1- یاخیبوون ل سەر دیوارێن کارتۆنی:
ئەپیای دگۆت: «ئەکتەر یێ سێ ڕەهەندی یە (جەستەیێ وی قەبارە هەیە)، پا چەوا ئەم وی ددانینە پێشیا وێنەیەکێ تەخت و دو ڕەهەندی؟». وی هەمی ئەو قوماش و تابلۆیێن کێشایی یێن ل پشت ئەکتەران لادان، و ل شوونا وان دەست ب ئاڤاکرنا بنیاتەکێ ڕاستەقینە ل سەر دەپێ شانۆیێ کر.
2- داهێنانا پلەو ئاستێن جودا :
ئەپیای داهێنانا شێوازەکێ نوو یێ بنیاتنانێ کر؛ وی دەپێ شانۆیێ پڕکر ژ پلەو پەیسکان، ستوون، حەوشک، و تەختێن بلند و نزم. وی دڤیا ئەکتەر نەک تنێ ل چەپ و ڕاست بڕێڤە بچیت، بەلکو بشێت بچیتە سەرێ و بهێتە خوارێ. ئەڤ شێوازێ بنیاتنانێ هێزەکا مەزن ددا لڤینێن ئەکتەری و دیمەنێن گەلەک لایێن هونەری دکرە داهێنان.
3- تێکەلکرنا تەختی و ڕۆناھیێ:
ل دەڤ ئەپیای، داهێنانا تەختێ شانۆیێ بێی ڕووناھیێ تمام نەدبوو. وی دگۆت ڕۆناھی وەک مۆزیکێ یە، دشێت شێوازێ قەبارێ تەختەی بگوهۆڕیت. دەما وی پەیسک و دەرگۆش ئاڤادکرن، وەک ئەندازیارەکێ تەلارسازی هزرا وێ چەندێ دکر کا دێ چەوا سێبەر ل سەر ڤان پێکهاتان کەن، دا کو دیمەنەکێ کویر و ڕاستەقینە بدەتە بینەری.
4- بابێ شانۆیا سەردەم:
هەر چەندە د سەردەمێ وی دا گەلەک ڕێگری ل کارێن وی هاتنە کرن، چونکی بیرۆکەیێن وی گەلەک ل پێش سەردەمێ وی بوون، لێ ئەڤرۆ چ شانۆ ل جیهانێ نینە ئەگەر پشتبەستنێ ل سەر بنەمایێن ئەدۆلف ئەپیای نەکەت. ئەو داهێنەرێ ڕاستەقینە یێ فەزایێ شانۆیێ بوو.
ئەدۆلف ئەپیای سەلماند کو دەپێ شانۆیێ نە تنێ جهەکێ چۆلە بۆ ڕاوەستانا ئەکتەری، بەلکو ئەو ب خۆ ئامرازەکێ ئەندازیاری یێ زێندی یە کو چیرۆکێ دەردبڕیت. وی گیان کرە ناڤ د دار و تەختێن شانۆیێ دا.
