پتاتا دەشتا ناڤكوڕێ بازاڕێن ناڤەڕاست و باشوورێ ئیراقێ داگیركرینە
رەمەزان زەكەریا
ل ئەڤساڵە دا ل سنوورێ دەڤەرداریێن ئاكرێ و بەردەڕەش و شێخان، زێدەتر ژ ١٨ هەزار دۆنەمێن ئەردی ب پتاتا هاتینە چاندن و جۆتیارێن دەشتا ناڤكوڕ نوكە كارێ كۆمكرنا بەرهەمێن خۆ نە و ژبەر ڕەنگ و كوالێتییا وێ یا بلند ب زێڕێ زەر هاتیە ناسین.
بۆ دەمێ دو حەفتییانە ل دەشتا ناڤكوڕ وەرزی كۆمكرنا پتاتا دەستپێكریە جۆتیار ب ئامێرێن تایبەت و تراكتۆران و ب هاركارییا زێدەتر ژ ١٧٠ كرێكاران، كارێ كۆمكرنا بەرهەمی نە.
فەهەد خێل، جۆتیارەكێ دەڤەرێ یە بۆ ئەڤرۆ گۆت: ئەڤسالە ڕێژەیا بارانبارینێ زۆر بوو و لەورا ئەگەرێ ڕزینا شكەك ژ پتاتان، بەلێ ئەوا مایی شیا زۆر باشی پێ بگەهیت، نوكە كارێ كۆمكرنا بەرهەمی دكەین پشكەك بۆ بازرگانێن بەغدا و بەسرە دهنێرین و پشكەكا دی ژی د كۆگایان دا هەڵدگرین.
خالس سامی، جۆتیارەكێ دی یێ دەڤەرێ یە بۆ ئەڤرۆ گۆت: نێزیكی دو حەفتییانە مە دەست ب كاری كریە و بەرهەم زۆرێ باشە داخواز دكەین ڕێگری ل هاوردەكرنا پتاتا دەرەكی بهێتە كرن دا كو جوتیارێن ناڤخۆ زیانمەند نەبن و بشێن بەرهەمێن خۆ ب بهایەكێ باش ساخ بكەنەڤە.
مەحموود محەمەد بازرگانەكێ ئیراقی یە گۆت: هەموو سالێ ل دەمی دهێنە هەرێما كوردستانێ چونكی ل ئاخەكا ب خێرو بەرەكەت هەیە و بەرهەمێ هەموو جۆرە فیقی و كەسكاتی زۆر جوان و كوالێتییا وان بلندە، ژبەر ناڤ و بانگێ پتاتا كوردستانێ ڕاستەوخۆ سەردانا ئەردێ پتاتا دكەین..
ل دووڤ پێشبینییێن جهێن پەیوەندیدار، چاڤەڕێ دهێتە كرن بەرهەمێ ئەڤسالە یێ دەشتیا ناڤكوڕ بگەهیتە زێدەتر ژ ٢٠٠ هەزار تەنان، ئەڤە ژی وەك دەستكەفتەكێ مەزن بۆ كەرتی چاندنێ یێ دەڤەرێ دهێتە دانان چونكی ل سەر ئاستێ ڕەنگ و قەبارەی پتاتا ئەڤسالە ب جۆرەكی یە كو د سالێن بوریدا وەك وێ نەبوویە.
