ئەڤسالە بەرهەمێ هنگڤینی ژ چار سالێن بۆری باشترە
رەمەزان زەكەریا
پشتی چار سالا ژ كێمبوونا بەرهەمی هنگڤینی ژبەر هشكەسالیێ، ئەڤسالە بەرهەمێ مێشڤانێن كوردستانێ گەشەیەكا بەرچاڤ ب خۆڤە دیتییە و ب ئەگەری زێدەبوونا ڕێژەیا بارانبارینێ و باشبوونا كەشوهەوای دێ پتری چار سالێن بووری دێ هنگڤین هێتە بەرهەمئینان.
بێستون تەیفور مێشڤانە بۆ ئەڤرۆ گۆت: د چوار سالێن بووری دا ژبەر هشكەسالیێ بەرهەمێ هنگڤینی زۆر كێم بوو، بەلێ ئەڤسالە ڕەوش ب تەمامی هاتیە گۆهرین و بەرهەمەكێ زۆرتر و باشتر د رێكێ دایە، هەمەجۆریا گۆڵ و گیایی د ئەڤسالە دا ئەگەر بوو مێش شیلەیێن جۆراوجۆر كۆم بكەن، ئەڤێ چەندێ ژی جۆرایەتییا هنگڤینی گەهاندیە بلندترین ئاست و گەشەیا پورێن مێشێ ژی ب ەنگەكێ بەرچاڤ زێدە بوویە.
ناڤبری گۆت ژی: ئەو سالێن بارانێن باش د بارن بەرهەمێ هنگڤینی زێدە دبیت و تاما وی ژی خوشترە، ژبەركو پتریا جۆرێن گولا ل بارانبارینا زۆر شوین دبن زۆر بوونا هنگڤینێ سروشتی ب رێژەیا بارانبارینێ و وەرزێن سالێ ڤە گرێدایە، ژێدەرێ سەرەكیێ دروستكرنا هنگڤینێ سروشتی گیا و گولێن بهارێنە.
ئۆسمان مەجید شارەزایێ بوارێ پەروەردەكرنا مێشا بۆ ئەڤرۆ گۆت: هشكەسالی گەهشتبوو ئاستەكێ مێشڤانا شیانێن ب رێڤەبرنا كارێن خۆ ژدەست دابوو، ژبەركو ژێدەرێن ئاڤێ هشك ببوون بەلێ ئەڤسالە ژبەر بارانێن زۆر و ڤەژاندنا ژێدەرێن ئاڤێ ڕێژەیەكا زۆر باشتر هنگڤین بەرهەم هاتییە.
ناڤبری گۆتژی: داخوازێ ژ حكومەتێ و وەلاتییان دكەم پشتەڤانیا بەرهەمێ ناڤخۆیی بكەن، ژبەركو ئەو هنگڤینێ ژ دەرڤە دهێتە هاوردە كرن زۆربەیا وێ ساختەیە و زیانێ ب بەرهەمێ ناڤخۆیی دگەهینیت، هەروەسا پێشنیاز دكەم پێشانگەهێن ناڤخۆیی و نێڤدەولەتی بۆ هنگڤینێ كوردستانێ بهێنە ڤەكرن، ب تایبەتی ئەڤسالە جۆرایەتییا وێ گەهشتبوو ئاستەكێ زۆر بلند و دشێت ركابەریا بەرهەمێ وەلاتێن عەرەبی و جیهانی بكەت.
