بێی پشکداریا کوردان و نەتەوەیێن بندەست چو گوهۆڕین ل ئیرانێ روو نادەن
چاڤدێرێن سیاسی دیار دکەن ئارمانجا نها یا ترامپی وەرگرتنا دەرتەنگا هورمزێ یە و چو بەرنامەیێن ترامپی بۆ پاشەرۆژا ئیرانێ نینن و ئسرائیل ژی نها پشکداری د شەڕی دا نەکریە و بێی کوردان و نەتەوەیێن بندەست ل ئیرانێ چو گوهۆڕین روو نادەن.
مەیسەم مورادی چاڤدێرێ سیاسی یێ خەلکێ رۆژهەلاتێ کوردستانێ دیار کر، ئێڕشێن ڤێ دووماهیێ یێ ئەمریکا زێدەتر ژ بۆ وەرگرتنا دەرتەنگا هورمزێ یە، ترامپ و کەسێن نێزیکی وی گەهشتینە ڤێ باوەریێ کو دڤێت دەرتەنگا هورمزێ ژ دەستێ ئیرانێ دەرخینن و ل هەمبەر دا ئیران ژی باش دزانیت هەکە کۆنترۆلا دەرتەنگا هورمزێ ژ دەست بدەت دێ ئەو یەک بیتە ئەگەرێ لاوازیا پێگەهێ ئیرانێ و ئیران نەشێت ئێدی هاریکاریا گرۆپێن چەکدار ژی بکەت و گۆت: (رێکێن ئەسمانی و ئەردی یێن کو بەری نها ئیرانێ هاریکاری بۆ گرۆپێن چەکدار رەوانە دکرن ژ دەستێ ئیرانێ دەرکەفتتیە ب تایبەتی ژی رێیا ئەردی یا گەهاندنا هاریکاریا بۆ حزبوللا لوبنانێ ب رێیا سووریێ و ب رێیا ئەسمانی ژی نەشێت، ڤێجا هەکە رێیا دەریایی ژ دەستێ ئیرانێ دەرکەڤیت وی دەمی دێ ئیران ب تەمامی هێتە دۆرپێچ کرن، ژ بەر ڤێ یەکێ ژی دەرتەنگا هورمزێ بۆ ئیرانێ ستراتیژی یە).
ناڤهاتی ئەو یەک ژی دیار کر، بەرنامەیێ ئەمریکا و ترامپی بۆ پاشەرۆژا ئیرانێ دیار نینە، ئسرائیلێ ژی نەڤێت ببیتە پشکەک ژ بەرنامەیێ ترامپی، چونکی ئارمانجا نها یا ئەمریکا ئەوە دا ئیرانێ تەنگاڤ بکەت و ئیران نەچار بیت داخوازیێن ئەمریکا قەبوول بکەت و ڤەگەریتە ڤە سەر مێزا دانوستاندنان، لێ ئسرائیلێ ئارمانجێن جودا هەنە و ئسرائیل کار بۆ گوهۆڕینا رژێما نها یا ئیرانێ دکەت، ژ بەر ڤێ یەکێ ژی هەتا نها ئسرائیل بەرهەڤ نینە پشکداریێ د شەڕی دا بکەت و هەکە بەرنامەیێ ئەمریکا بهێتە گوهۆڕین یان ژی ترامپ کار بۆ گوهۆڕینا رژێما ئیرانێ بکەت وی دەمی دبیت ئسرائیل و وەلاتێن دی یێن هەڤپەیمانێن ئەمریکا ژی هەلوەستەک جودا نیشا بدەن.
د. هێمن سەیدی بسپۆرێ کاروبارێ ئیرانێ ژی دیار کر، شەڕێ ٤٠ رۆژان یێ د ناڤبەرا ئەمریکا و ئسرائیلێ ل گەل ئیرانێ دا بۆ گوهۆڕینا رژێما ئیرانێ گەلەک گرنگ بوو، براستی ژی وی دەمی ئیران گەلەک تەنگاڤ ببوو و بەرنامە ژی وەسا بوو پشتەڤانی ل کوردان و نەتەوەیێن دی یێن بندەست ل ئیرانێ بهێتە کرن، ل گۆر دەزگەهێن راگەهاندنا ئەمریکا ئەردۆغانی شیا ترامپی رازی بکەت دەست ژ وی بەرنامەیی بەردەت و بێگومان بێی کوردان و نەتەوەیێن دی یێن بندەست ل ئیرانێ گوهۆڕینا دەستهەلاتێ گەلەک زەحمەتە و هەر کەس دزانیت ئەمریکا نەشێت ب رێیا ئێرشێن ئەسمانی چو گوهۆڕینان ل ئیرانێ بکەت.
ناڤهاتی ئەو یەک ژی دیار کر، دڤێت بەری هەر تشتەکێ بەرنامەیێ ئەمریکا بۆ پاشەرۆژا ئیرانێ زەلال بیت، چونکی هەتا نها ئەمریکا چو بەرنامە نینن و ل ئالیێ دی گرنگە پشتەڤانی ل کوردان بهێتە کرن، چونکی نها کورد هێزێن خوە یێن چەکدار هەنە و هەروەسا کورد ل ئیرانێ خوە رێکخستن کرینە و دشێن ببنە هێزەکا گەلەک مەزن و کاریگەر بۆ گوهۆڕینا رژێما ئیرانێ، لێ هەتا نها تشتەک وەسا د بەرنامەیێ ئەمریکا دا نینە و ترامپ ژ بەر هندەک بەرژەوەندیێن خوە هەتا نها پشتەڤانی ل دژبەرێن رژێما ئیرانێ نەکریە و گۆت: (ترامپ یێ کار بۆ بەرژەوەندیێن خوە دکەت و ئارمانجا وی گوهۆڕینا رژێما ئیرانێ نینە، ژ بەر ڤێ یەکێ ژی د ئاستێ ناڤخوەیی یێ ئیرانێ دا ژی چ دلخوەشیەک ل هەمبەر ئێرشێن نها نینن و خەلک دزانن یا نها ترامپ دکەت نابیتە ئەگەرێ ژناڤچوونا رژێما ئیرانێ و ژ بەر ڤێ یەکێ ژی هەرچەندە هەتا نها زیانێن گەلەک مەزن گەهشتینە رژێما ئیرانێ، لێ ئەو یەک نەبوویە ئەگەرێ چو گوهۆڕینان).
ل ئالیێ دی گەلەک چاڤدێرێن سیاسی ژی دیار دکەن، سیاسەتا هێزێن کوردی ل رۆژهەلاتێ کوردستانێ هەتا نها گەلەک باش بوویە، چونکی هەتا ئەمریکا و هەڤپەیمانێن وێ چو بەرنامە بۆ ئیرانێ نەبن و کار بۆ ژناڤبرنا رژێما نها نەکەن نابیت کورد ببنە پشکەک ژ شەڕێ نها، چونکی پرسا کوردی پرسەک گەلەک جودایە و کورد داخوازا مافێن خوە یێن رەوا ل ئیرانێ دکەن، لێ مخابن نها ئەمریکا کار بۆ ڤی یەکێ دکەت دا ئیران هندەک داخوازیێن وێ قەبوول بکەت و هەتا رژێما ئیرانێ ژی بمینیت دێ هەردەم مەترسی بۆ کوردان و نەتەوەیێن دی هەبن.
هەروەسا بەری دو رۆژان رێکخستنا مافێن مرۆڤی یا رۆژهەلاتێ کوردستانێ ژی دیار کر، پشتی راگرتنا شەری رژێما ئیرانێ دەست ب کوشتن و گرتنا کوردان کریە و ب دەهان چالاکڤانێن کورد هاتینە دەستەسەرکرن و هەروەسا زۆرداریا ل سەر کوردان و بەلوچیان ل ئیرانێ گەلەک زێدە بوویە.
