پەیاما هەیڤێ
هەژین فەرەج
ل ئەسمانی هەیڤ دبرسقیت
و ل ئەردی پێلێن دەریایێ دلەیزن
ئاڤ ب هاتنا وێ بەختەوەرە
دزانیت بێ هەیڤ دێ مریت
بێدەنگی دلێ گەردوونی دگریت
هەیڤ و ئاڤ دو یارێن ئەبەدینە
هێز و ژیانەکا نوو ددەنە ناخی
برینێن مەزن دپێچن…
هەیڤ و ئاڤ دو دلێن عاشقن
ب دەزیێن رۆناهیێ ئێك دگرن
د دیمەنەكێ سریالی دا
خەیالێ دبڕن
و ل سەر عەرشێ هەبوونێ
گەردەنا ژیانێ
ب رستكەكا وەفایێ
دخەملینن
د هەمبێزەكا ئارام و
دویر ژ چاڤێن رەشەكێن ستێرا
ماچان ل سەر واتایێ درەشینن.
