دخوازين تورکیا ب فەرمی دانپێدانێ ب ئۆلا ئێزدييان بکەت
ب ئامادەبوونا میرێ ئێزديیان میر حازم تەحسین بەگ، ئۆلدار و ڕاوێژکارێن میری، کەسایەتیێن جڤاکی یێن ئێزدی و هژمارەکا مەزنا ڕەڤەندا ئێزدی ل دیاسپۆرایێ، ل گەل پشکداریيا بەرپرسێن بلند یێن حکومەتا تورکیا بەڕێ بنیاتی بۆ مەزارێ شێخ هەڤند ل ناوچەیا بشێریێ یا سەر ب باتمانێ ڤە هاتە دانان.
د ڤێ سەرەدانێ دا، میرێ ئێزدیيان میر حازم تەحسین بەگ سوپاسيا گەل و حکومەتا تورکیا کر و راگەهاند، ئەڤ وەلاتە یێ هەموو پێکهاتەیانە. وی دوپاتكر کر کو ئێزدی بەشەکێ ڕەسەن يێ ڤی وەلاتینە و نە مێهڤانن.
هەروەسا ئاماژە ب هندێ کر، پێدڤیيە کەشوهەوایەکێ گونجايى بۆ ئێزدیيان بهێتە ڕەخساندن دا کو ب ئازادانە ڕێورهسمێن خۆ یێن ئۆلى برێڤە ببەن، و داخواز کر کو د دستوورێ تورکیا دا ب فەرمی دانپێدان ب ئۆلا ئێزدييان بهێتە کرن.
ژ لایێ خۆ ڤە، بەرپرسێن حکومەتا تورکیا پشتگیری ل پەیاما میرێ ئێزدیان کر و دیار کرن، کو ئێدی تورکیا وەلاتێ هەموو پێکهاتەیانە، ب ڕێزەکا مەزن تەماشەی هەموویان دکەن و دێ بەردەوام بن ل سەر پشتەڤانیکرنا جڤاکێ ئێزدی.
