فوكس نیۆز: شارەزا هۆشداریێ ژ مفاوەرگرتنا داعشێ ژ ڤەكێشانا چاڤەڕێكری یا هێزێن ئەمریكی ژ ئیراقێ ددەن
ژڤانێ نێزیكبوونا ڤەكێشانا هێزێن سەربازی یێن ئەمریكی ژ ئیراقێ، كو بڕیارە ل دووماهیا مەها ئیلۆنا ئەڤ سالە بهێتە ئەنجامدان، ئالۆزی و نیشانێن پرسیارێ ل سەر ئاستێ دەزگەهێن هەواڵگری و ناڤەندێن بڕیارێ ل بەغدایێ و دەڤەرێ دروست كرینە. پێگەهێ «فوكس نیوز» یێ ئەمریكی د راپۆرتەكا خۆ دا ئاماژێ دكەت كو ل دووڤ راپۆڕتێن نێڤدەولەتی و شرۆڤەیێن ئەمنی، مەترسییا هەرە مەزن ئەوە كو رێكخراوا داعش یا تیرۆرستی مفای ژ ئەوێ ڤالاهییا ئەمنی و سیاسی وەربگریت كو دێ پشتی دەركەفتنا هێزێن نێڤدەولەتی پەیدا بیت. ئەڤ پێشبینییە هەڤدەم دەردكەڤن ل گەل بەلاڤبوونا پێزانینێن نوو یێن هەواڵگری یێن ئیراقی ئەوێن ئاماژێ ب بلندبوونا رێژەیا چەكدارێن داعشێ د ئاخا سووریێ هەڤسێ دكەن.
زێدەبوونا چەكداران ل سووریێ و گەفا ل سەر سنۆری
ئەڤ پێگەهێ ئەمریكی ئاماژێ ددەت كو ل دووڤ داتایێن هەواڵگری یێن ئیراقی، ژ دەمێ كەفتنا رژێما بەشار ئەسەدی د سالا 2024ێ دا ل سووریێ، هەژمارا چەكدارێن رێكخراوا تیرۆرستی یا داعشێ ل وی وەلاتی ژ نێزیكی دوو هەزار كەسان بازداییە بۆ پتر ژ 10 هەزار چەكداران. ئەڤ زێدەبوونا پێنج بەرامبەر مەترسییەكا ب هێز و راستەوخۆ ل سەر سنۆرێن رۆژئاڤایێ ئیراقێ دروست دكەت. شارەزا دیار دكەن كو سنۆرێ د ناڤبەرا ئیراقێ و سووریێ دا هێشتا ل هەموو دەڤەران ب تەمامی كۆنترۆلكری نینە، و داعش هەمبەر هەموو ئاستەنگان، ب بێدەنگی مژوولی ئاڤاكرنا شانەیێن ژێرزەمینی و بهێزكرنا بنگەهێن خۆ یێن لۆجیستییە د دەڤەرێن چۆل و بیابانان دا.
سیناریۆیا سالا 2014ێ و هەڤكێشەیا ئاڵۆز یا ناڤخۆیی
فوكس نیوز ژ زاردەڤێ دیاركر كو شارەزایێ ئەمنی عومەر محەمەد د ئاخڤتنەكێ دا ل سەر رەوشا نوكە هۆشداریێ د دەت كو ئەڤ رەوشە بیرهێنەرا وان روودانانە ئەوێن ل بەری كەفتنا باژێڕێ مووسلێ د 2014ێ دا رووداین. ئاڵۆزییا نوكە ژ وێ چەندێ دهێت كو گرۆپێن چەكدار بزاڤان دكەن گەفا داعشێ بكاربینن وەك ئامرازەك بۆ پاراستنا چەكێ خۆ و رادەستنەكرنا وی بۆ حوكمەتا فیدرالی، د دەمەكێ دا كو داعش ژی هەر ڤێ ئالۆزیێ بكاربینیت بۆ كێشان و جهگیركرنا گەنجان د رێزێن خۆ دا. ئەڤ هەڤكێشەیا ئالۆز باژێڕان د ناڤبەرا دەزگەهەكێ ئەمنی یێ لۆكالی و گرۆپێن یاخی دا دهێلیت، ئەڤە ژی د دەمەكێ دا كو بەغدایێ بڕیار دایە پرۆسەیا كۆمكرنا چەكی ل دەرڤەی دەستەلاتا دەولەتێ ب ئەنجام بگەهینیت.
شەڕێ پارتیزانی ل شوونا كۆنترۆلكرنا باژێڕان
فوكس نیوز زێدەتر دبێژیت، سەرەڕای وێ چەندێ كو ئیراقێ د سالا 2017ێ دا سەركەفتنا سەربازی ب سەر رێكخراوا داعشێ دا راگەهاندبوو، بەلێ وێ رێكخراوا تیرۆرستی د نوكە دا شێوازێ شەڕێ خۆ گۆهوڕییە. داعشێ دەست ژ بزاڤێن دەستبەسەرداگرتنا راستەوخۆ یا باژێڕان بەردایە و پشت ب شەڕێ پارتیزانی، ئۆپەراسیۆنێن بلەز و دەستبەردایی، تێرۆركرن و چاڤتڕساندنێ گرێدایە. نوكە شانەیێن نڤستی یێن وێ رێكخراوێ د دەڤەرێن دوورەدەست و چیایی یێن پارێزگەهێن كەركووك، سەلاحەدین، دیالا و ئەنبارێ دا چالاكن و مفای ژ ڤالاهیێن ئەمنی بۆ هێرشێن خۆ وەردگریت.
بەرسڤا بەغدا ب ڕێكا ئۆپەراسیۆنێن پێشوەخت
ل دووماهییا راپۆرتا خۆ ئەو پێگەهێ ئەمریكی دبێژیت، د بەرسڤا ڤان چاڤدێریێن مەترسیدار دا، هێزێن تایبەت یێن ئیراقی ب پشتەڤانییا ئەسمانی و هەواڵگری، زنجیرەیەكا ئۆپەراسیۆنێن پێشوەخت و دابەزینا ئاسمانی ل سەر حەشارگەهـێن داعشێ دەستپێكرینە، وەك ئەو ئۆپەراسیۆنا دووماهیێ ئەوا ل پارێزگەها كەركووكێ هاتییە ئەنجامدان. ئارمانجا سەرەكی یا بەغدایێ ئەڤەیە كو ب ڕێكا هەواڵگریا هوور، ل بەری داعش بشێت رێزێن خۆ د ندەڤەرێ دا رێكبێخیتەڤە یان مفای ژ ڤەكێشانا هێزێن ئەمریكی وەربگریت، بنگەهـ و تورێن وان یێن لۆجیستی تێكبدەت و ڕێگریێ ل ڤەگەڕیانا وان ب شێوەیەكێ بەرفرەهـ بكەت.
